भांगरभूंय | प्रतिनिधी
हो प्रकल्प बेकायदेशीर: समाज कार्यकर्ते आनी नगरसेवकांचो दावो
म्हापशें ः म्हापशेंच्या नव्या पालिका वेपारी संकुलाचे इमारतीक ऑक्युपन्सी प्रमाणपत्र ना. तशेंच ह्या प्रकल्पाचें प्रकरण न्यायप्रविश्ठ आसा, अश्या वेळार म्हापश्यां नगरपालिका आनी नगरविकास खातें हें ह्या बेकायदो प्रकल्पाचें लोकार्पण बेकायदेशीरपणान करतात, असो दावो समाज कार्यकर्ते संजय बर्डे हांणी केला.
तशेंच इमारतीच्या संरचनेभोंवतणी गरजेचे ‘सेटबॅक’ म्हळ्यार मेकळी सुवात ना आनी हेच इमारतीची सुवात संपादन करचे वेळार कायदेशीर प्रक्रिया पाळूंक ना, असो आरोप करीत समाजकार्यकर्ते संजय बर्डें हांणी हे इमारतीचो शुक्रारा जावपी लोकार्पण सुवाळो बेकायदेशीर आशिल्ल्याचो दावो केलो.
म्हापश्यां शुक्रारा आयोजीत पत्रकार परिशदेंत ते उलयताले. ह्या वेळार सितेश मोरे आनी सचिन किटलेकार हजर आशिल्ले. त्यान पयलीं बर्डे हांणी नगरविकास मंत्री, नगरविकास खात्याचे संचालक, पालिका मुख्याधिकारी हांकां निवेदन सादर केलें.
संजय बर्डेन सांगलें, हें वेपारी संकुल जंय उबें रावलां, थंय एका मनशाच्या खाजगी शंभर चौ.मी. सुवातेर जीसूडा आनी पालिकेन अतिक्रमण केलां. संकुलाचें इमारतीचें मोजमाप आनी आराखडो वेवस्थीत करूंक ना. हे विशीं, संबंदीत मनशान न्यायालयांत धांव घेतली तेन्ना न्यायालयान हो प्रस्न समोपचारान सोडोवन जीसुडाक संबंदीतांक सांगिल्लें. मात पालिकेन आजूनय हाचेर निर्णय घेवंक ना. हे विशीं कितेंच सेटलमेंट करूंक ना.
तशेंच हे नवे वेपारी संकुल इमारतीक ऑक्युपन्सी प्रमाणपत्र ना, जीसुडान ही इमारत पालिकेकडेन दिवंक ना. अशें आसून लेगीत हे इमारतीचो लोकार्पण सुवाळो आयोजीत करून पालिकेन बेकायदेशीर प्रकार चलयलो, असा आरोप बर्डे हांणी केलो.
पालिका प्रशासकीय यंत्रणां अशे तरेन कायद्याचे नेम मोडीत स्वता बेकायदेशीरपणाक उर्बा दिता. लोकप्रतिनिधी अशा अनधिकृत इमारतीचें उक्तावण करतात, हाचे परस दुसरी शोकांतिका ना, अशी टिका तांणी केली.
मजगतीं, हे इमारतीक योग्य सॅटबॅक ना, इमारतीच्या बेकायदेशीरपणा आड कोणेंय हरकत घेतल्यार, हो प्रकल्प बंद पडपाक शकता. ह्यान पयलीं म्हापशें शारांतल्या पालिकेचे तीन प्रकल्प सध्या तशेच पडून आसात. पालिका मंडळ आनी प्रशासकीय अधिकार्यांचो सध्या आळसायेचो कारभार सुरु आसा. याचिकादार जमिन मालकाला देड ते २ कोटी रूपयांची ह्या संकुलांत मालमत्ता आतां पालिकेक दिवची पडटली. हाका लागून हे इमारती बाबतींत हो भितरलो वाटाघाटीचो प्रकार आशिल्ल्याचो दुबाव आनीक खर जाला आनी ह्याच सेटींगाक लागून इमारतीचे बेकायदेशीर पध्दतीन उक्तावण करतात, असोय आरोप बर्डे हांणी केलो.
मजगतीं, ह्या वेपारी संकुलाच्या उक्तावणाक नगरसेवक अॅड. शशांक नार्वेकार हांणीय आक्षेप घेवन उक्तावणाची कार्यावळ रद्द करपाची मागणी नगराध्यक्षांक निवेदन सादर करून मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
