भांगरभूंय | प्रतिनिधी
नगरसेवकांचो आरोपः पालिका मंडळाचे बसकेंत अभियंत्यांचेर फोग
भांगरभूंय । प्रतिनिधी
म्हापशें: म्हापशें पालिकेच्या तंत्रीक विभागांतले अभियंते कामचुकार जाल्यात. ते अकार्यक्षम अभियंते फक्त बसून पगार घेतात आनी कामां पांच पयशांचीय करिनात. लोकप्रतिनिधींनी केल्ल्या सुचोवण्यां कडेन मुद्दाम आडनदर करतात, नाका जाल्ल्यो जापो दितात. ताची नजर फक्त येणावळी कडेन आसता. पालिकेचें प्रशासनूच कोसळ्ळां, अशे आरोप नगरसेवक प्रकाश भिवशेट हांणी केले आनी अभियंत्यांच्या चुकांचो पाडोच वाचलो.
बिरेस्तारा 4 मेक म्हापशें पालिका मंडळाची साबार बसका नगराध्यक्ष प्रिया मिशाळ हांचे अध्यक्षते खाला जाली. ह्या वेळार उपनगराध्यक्ष विराज फडके, मुख्याधिकारी अमितेश शिरवयकार, पालिकेचे कनिश्ठ अभियंते, लेखाधिकारी हाजीर आशिल्ले. चंद्रशेखर बेनकार आनी अॅड. शशांक नार्वेंकार सोडून बाकीचे सगळे नगरसेवक तशेंच नगरसेविका हाजीर आशिल्ल्यो.
राज फावंडेशन डॅव्हलॉपरच्या करासवाड्या वयल्या बांदकाम परवान्याच्या नुतनीकरणा संबंदांत प्रशासकीय लवादान म्हापशें पालिकेक 7.51 लाख रुपया शुल्क भरपाचो निवाडो दिला. पालिका अभियंत्यांनी शुल्काचें अदमास पत्रक तयार करून 96 लाख रुपया पालिकेंत जमा करपाक सांगिल्लें. पालिकेच्या ह्या प्रस्तावाचे याचिके प्रमाण नगरपालिका संचालनालयान ती याचिका निकालांत काडून 96 लाखांतले फक्त 3 लाख रुपयाच पालिकेंत जमा करपाचो आदेश दिल्लो. त्या आदेशाक पालिकेन प्रशारकीय लवादा कडेन आव्हान दिल्लें. लवादान जानेवारींत ताचेर निकाल दिवन राज हावसिंगाक 7.51 लाख रुपया पालिकेंत भरचे, असो निवाडो दिल्लो. तो निवाड्याचो मुद्दो पालिका मंडळाचे बसकेंत गाजलो.
चर्चे उपरांत त्या निवाड्याक उच्च न्यायालयांत आव्हान दिनासतना लवादाच्या निवाड्या प्रमाण 7.51 लाख रुपया शुल्क घेवपाचो थाराव घेतलो. पूण नगरसेवक प्रकाश भिवशेट हांणी अभियंत्यांचे चुकीक लागून पालिकेक वयलो शुल्क वगडावचो पडलो अशें सांगलें. 2014 च्या बांदकाम परवान्याच्या नुतनीकरण शुल्काचें अदमासपत्रक वेवस्थीत करूंक ना. तशेंच अभियंत्यांनी आपलें काम वेवस्थीत केल्लें जाल्यार पालिकेक पालिका संचालनालय आनी प्रशासकीय लवादा कडेन वच्चें पडचें नाशिल्लें. तांचे चुकीक लागून 96 लाखांचो आंकडो 7.51 लाखांचेर आयलो. त्या अभियंत्यांचे चवकशी जावची अशी मागणी भिवशेट हांणी केली. तशेंच सत्ताधारी गटांतल्या नगरसेवकांनी लेगीत ते अभियंते आपलीं कामां वेवस्थीत करिनात, अशें सांगून तांचे एकंदरीत कामाचेर पद्दतीचेर बडी मारली.
15 व्या वित्त आयोगाचे निधी खाला दरेका प्रभागांक 15 लाख रुपया मंजूर जाल्ले. दोन वर्सां आदीं आपूण हे निधी खाला कांय उदरगतीच्या प्रकल्पांचें प्रस्ताव मांडले. निविदा आयल्यो, पूण अजून मेरेन पांच पयशांचें काम जावंक ना. हाचोच अर्थ पालिका अभियंते सुस्तावल्यात, ते कामां करिनात. अभियंते पेव्हर्स घातल्यात अशें सांगतात जाल्यार तांणी चार दिसां भितर त्या पेव्हर्सांचें मोल आनी कामाचो नियाळ सादर करचो. तशेंच कामाच्या फायलींचेर सय घेवचे खातीर लोकप्रतिनिधींक प्रशासकीय अधिकाऱ्यां कडेन प्रत्यक्षांत वचून सय घेवची पडटा. ते भायर कामाच्यो फायली लिपयतात, असोय आरोप भिवशेट हांणी केलो.
नगरसेविका अन्वी कोरगांवकार हांणी सांगलें, दोन वर्सां आदीं आपल्या प्रभागांत शिंपणावळ आनी भौशीक बांदकाम खात्या खाला कामां खातीर प्रस्ताव सादर केले, पूण तीं कामां अजून चालीक लागूंक नात. आमकां पालिकेच्या तंत्रीक विभागांत दर मेजार वचून फायली मंजूर करून घेवच्यो पडटात. नगरसेवक विकास आरोलकार हांणी सांगलें, आपल्या प्रभागांतल्या रस्त्याच्या कामाची फायल अशीच अडकून उरल्या.
पर्रीकारांचो पुतळो आपूण बांदून दिताः तारक आरोलकार
अखील गोमंतक म्हासंघ हितवर्धक मंडळान आदले उपमुख्यमंत्री फ्रांसीस डिसोझा हांचो पुतळो उबारपाक मंजुरी दिल्या. तशेंच आदले मुख्यमंत्री मनोहर पर्रीकार हांचोय पुतळो उबारपाची विनवणी वयले संघटणेक करपाचें बसकेंत थारलें. ती संघटणा पर्रीकार हांचो पुतळो उबारपा खातीर तयार ना जाल्यार आपूण स्वताचे पयशे मोडून बांदतलों, अशें नगरसेवक तारक आरोलकार हांणी सांगलें. ते प्रमाण ते दोनूय पुतळे पालिकेच्या नव्या प्रशासकीय इमारती मुखार उबारपाचे थाराव घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
