म्हापशें पालिकेचेर फाल्यां वेपाऱ्यांचो मोर्चा

भांगरभूंय | प्रतिनिधी

म्हापशेंः म्हापशें पालिकेन पूर्वलक्षी प्रभावाची थकबाकी आनी साबंखाच्या दरा प्रमाण दुकान भाडें वसूल करपाचो निर्णय म्हापशें बाजारपेठेंतल्या वेपाऱ्यांचेर लादला. पालिका मुखेल अधिकारी चंद्रकांत शेटकार हांच्या ह्या मनमानी आनी हुकूमशाय वेवस्थापनाक विरोध करपा खातीर बुधवारा, 8 तारखेर म्हापशें वेपारी संघटना आनी अखिल गोंय वेपारी संघटणेन पालिकेचेर भव्य मोर्चा व्हरपाचो निर्णय घेतला अशी म्हायती संघटनेचे पदाधिकारी आशीश शिरोडकार हांणी दिली.
मंगळारा, 7 तारखेर म्हापशें जाल्ले पत्रकार परिशदेंत अखिल गोवा वेपारी महासंघाचे अध्यक्ष नारायण कारकेर, म्हापशें वेपारी संघटनेचे अध्यक्ष जितेंद्र फाळारी, सचीव सिद्धेश राऊत, संदीप फाळारी, यशवंत गवंडळकार, श्रीपाद सावंत, अनीश जोशी, वल्लभ मिशाळ, फळारी हाजीर आशिल्ले.
नारायण कारेकार हांणी सांगलें, फाटल्या कांय म्हयन्यां सावन आमी म्हापशें पालिकेचेर आनी सरकारी पांवड्यार दुकान भाड्याच्या कराराचें नूतनीकरण आनी दुकान हस्तांतरणाचे प्रस्न सोडोवपाचो यत्न करतात. शार उदरगत खात्यानय हे संबंदी कायद्यांत दुरुस्ती करपाची तयारी दाखयल्या. पूण सध्या पालिका मुखेल अधिकाऱ्यांनी सरकाराच्या आदल्या परिपत्रका प्रमाण म्हळ्यार 2013 वर्सा सावन थकबाकी वसूल करतलो. तशेंच दुकानाचें भाडें साबांखाच्या दरा प्रमाण फारीक करचें पडटलें अशी अट घाल्या. सरकारान ही प्रक्रिया स्थगीत करपाचो निर्णय घेतला हाची कल्पना दिवन लेगीत वरिश्ठ पांवड्यावेल्यान लेखी आदेश मेळूंक ना, देखून वसुली लेगीत थांबची ना अशी भुमिका मुखेल अधिकाऱ्यांनी घेतल्या. हाका लागून वेपाऱ्यां मदीं खर तिडक आनी अस्वस्थ वातावरण निर्माण जालां.
म्हापशें वेपारी संघटनेचे अध्यक्ष जितेंद्र फाळारी हांच्या फुडारपणा खाला वेपारी प्रशासकीय यंत्रणा आनी राजकी फुडाऱ्यांक मेळ्ळे तरी वयल्या प्रस्नाचेर ठोस उपाय मेळूंक ना. देखून आमकां आंदोलना सारकें पावल घेवचें पडलां. हे आंदोलन सरकारा आड न्हय तर नगरपालिका प्रशासना आड आनी नगरपालिका मुखेल्या आड आसा अशें करेकार हांणी स्पश्ट केलें.
फाल्यां बुधवारा सकाळीं 10 वरांचेर सगले वेपारी आपली दुकानां आनी वेवसायीक आस्थापनां बंद दवरतले अशें संघटनेचो वांगडी आनी आदलो नगराध्यक्ष आशीष शिरोडकार हांणी सांगलें. ते उपरांत सकाळीं 11 वरांचेर सगळे वेपारी मेळून म्हापशें पालिकेचेर मोर्चा व्हरतले. आमच्या मागण्यांचेर ल्खी आनी कायमस्वरूपी उपाय मेळना तो मेरेन हें चालूच उरतले. थळाव्या आमदारांनीय फाल्यां पालिकेंत हाजीर रावून आमचे प्रस्न सोडोवचें असो उलो शिरोडकार हांणी केलो.
संघटनेचे सल्लागार आदले नगराध्यक्ष संदीप फळारी हांणी सांगलें, आमचो सरकाराचेर राग ना. पूण प्रशासकीय पांवड्यावेले कांय अधिकारी मुद्दाम वेपाऱ्यांक त्रास दितात. उंचेल्या अधिकाऱ्यांची संमती आसून लेगीत हे अधिकारी ती चालीक लावपाक आडखळटात. पालिका मुखेल्यान लाखांनी रुपयांच्या थकबाकीच्या नांवान वेपाऱ्यांक नोटीस जारी करून त्रास दिवपाची नवी पद्दत चालीक लायल्या असो आरोप तांणी केला.