म्हापशें पालिकेंत वर्क फ्राॅम होम?

भांगरभूंय | प्रतिनिधी

जर हें खरेंच जाता, जाल्यार हें गुन्यांवकारी कृत्य जालें ना? कारण खंयच्याच कायद्यांत तशें बरयिल्लें ना.

खंयचीय संस्था, मागीर ती सरकारी जावं वा खाजगी बरे भशेन चलपाक, तिची सगल्या अर्थान उदरगत जावपाक जाय ते बरे अधिकारी, कर्मचारी आनी कामगार. तांकां कामाची आवड जाय. राज्य, देशा विशीं अभिमान आसपाक जाय. आंगांत प्रामाणिकपणा तर आसपाकूच जाय. दुसऱ्यां विशी तुच्छ भावना, अहंकार, दुस्वास, सुवार्थ आसलो काय ते संस्थेचें पाड पडलेंच म्हूण समजुचें. हातूंत स्वराज्य संस्थांचोय आस्पाव जाता. कांय पंचायत, पालिकांची येणावळ बेसबरी आसता, सरकारी अनुदानूय मेळटा. म्हणटकच तिचो कारभार बरे भशेन चलता. अर्थांत तशे लोकप्रतिनिधी, अधिकारी, कर्मचारी जाय. भितर एक पसून कुसको आंबो आसप धोक्याचें. तो सगलो पांटलोच कुसयता! मागीर हेर सगले वायट, भ्रश्टाचारी मनशाचोच आदर्श घेतात. प्रामाणीक व्यक्तीचो आदर्श घेवपी तशें उणेच. नाच म्हणल्यार जाता! अर्थीक फाटबळ नाशिल्ल्या स्वराज्य संस्थांचोय कारभार कामांत प्रामाणीकपणा आसल्यार बरो चलता. म्हणटकच पयशां परस बरे मनीस मेळप चड गरजेचें!!
म्हापशेंच्या पालिका मंडळाचे बसकेंत इतिवृत्त (मिनीट्स) सारकें नोंद जायना, असो आरोप विरोधी नगरसेवकांनी केला. कांय जाण तें घरा व्हरून आपणाक जाय तेच मुद्दे भितर घालतात, असो दावोय तांणी केलो आनी नगराध्यक्षाक उजरावन काडलो. जर हें खरेंच जाता, जाल्यार हें गुन्यांवकारी कृत्य जालें ना? कारण खंयच्याच कायद्यांत तशें बरयिल्लें ना. मागीर मिनीट्स घरा घेवन वता कोण?
पयर पालिका मंडळाची बसका जाली. आठ वरां सगले नगरसेवक, मुख्याधिकारी, हेर अधिकारी म्हापशेंचें कल्याण करपाच्या उद्दिश्टान भासाभास करताले. ह्या वेळार फाटल्या 30 आॅक्टोबराचे बसकेचें मिनीट्स मान्यताये खातीर दवरले. त्या वेळार तातूंत भासाभास केल्ले जायते मुद्दे आस्पावन घेवंक नात, अशें चार नगरसेवकांचे नदरेक आयलें. तांणी हरकत घेतली. हें मिनीट्स कांय जाण घरा व्हरून बदलतात. पालिकेचे व्हडले अधिकारी विरोधी नगरसेवकांच्या मुद्द्यांनी जाणून बुजून फेरफार करतात, असो आरोप दोगां नगरसेवकांनी केलो. बसकेचे ते मिनीट्स जाग्यार घालपाक वरभर गेलें. तेन्ना बसका सुरळीत जावंक जायना म्हूण विरोधक गरज नासतना चर्चा करतात, असो आरोप सत्ताधाऱ्यांनी केलो. ताचेर विरोधक आनी तांचे मदीं वाद जालो. मागीर थाराव मंजूर जायनासतना केल्लो स कंत्राटी कामगारांचे नोकर भरतीचो विशय कुशीक दवरून उरिल्लें मिनीट्स मान्य जालें. आतां हाचे मुखार सात दिसां भितर मिनीट्स सगल्या नगरसेवकांक दिवपाचें आस्वासन दिलां.
हें यूग डिजिटलाचें. म्हणटकच सगले मिनीट्स, नोंदी संगणका वरवीं नोंद जातात आसतल्यो. त्यो सात दिसां भितर न्हय, तर टायप करून फायनल जातकच सोमत्योच सगल्या नगरसेवकांक, अधिकाऱ्यांक धाडपाक मेळटात. तातूंतल्या म्हत्वाच्या गजालींची नोंद करून ती पत्रकारांकूय दिवपाक मेळटा. पालिका मंडळाची बसका लायव्ह करूं येता. पालिकेन आपले वॅबसायटीची, सोशल मिडियाची ते खातीर मजत घेवं येता. विधानसभेचें थेट प्रक्षेपण जाता, मागीर स्वराज्य संस्थांच्या बसकांचें कित्याक नाका? सरकारान जाय जाल्यार तशी अर्थीक निधीची तजवीज करची. म्हापशें पालिका बसकांचें मिनीट्स सात दिसांनी मेळटले, म्हणजे ते हातान बरयतात आसतले. आयज आधुनीक तंत्रज्ञान हाता कडेन आसतना अशें करप तितलेशें योग्य न्हय.
‘आमच्यो सुचोवण्यो, हरकती, प्रस्ताव मुद्दाम मिनीट्सांतल्यान गाळटात. दरवेळा ते भितर घाल अशें आमकां सांगचें पडटा. पालिका कायद्या प्रमाण आठ दिसां भितर मिनीट्स मेळपाक जाय. पूण आमकां तें स – स म्हयने मेळनात. मेळटकच भितरल्यो चुको तश्योच आसतात.’ असो दावो दोगां नगरसेवकांनी केला. ज्युनियर स्टेनोग्राफराक सेवेंतल्यान निलंबीत करपाची मागणी तांणी केल्या. पालिकेच्या लेखी कारभारांत बदल करप, भितरले मुद्दे गाळप, मिनीट्स दिवपाक उशीर करप इतलें धाडस स्टेनाग्राफराक आसतलें? कांय ताचे फाटल्यान कोण पेझाद व्यक्ती बी आसा? कोण ती? अधिकारी काय लोकप्रतिनिधी? काय भायल्या कोणाचो हात आसा? हाची चवकशी जावपाक नाका? हवेंत फार मारचे परस नगरसेवकांनी पत्रकार परिशद घेवन पुरावे दिवपाक जाय. म्हणटकच सरकाराक कारवाय करपाक मेळटली. हालींसराक आपलें काम प्रामाणीकपणान करून समाजाचें बरें करचें, उदरगत करची अशें थोड्यांक दिसना. हाका कसो चेंपचो, ताचें पांय कशे ओडचे, आपल्या मनशांक कसो फायदो करून दिवचो हाचेरूच थोड्यांचें लक्ष आसता. विरोधकांक, लोकांक सगलें खबर आसता, पूण पुरावे नाशिल्ल्यान तें कांय करपाक शकनात… आनी पुरावे आसलेय म्हूण दोशी व्यक्तीक जल्माची बुद्द घडटली, हाचीय खात्री कोण दिवंक शकना. अधाशीपणां तीं कितलीं?? कितेंय केलें म्हूण दुडवांचे पोटले काय वयर व्हरपाक मेळनात. भौशीक जिणेंतल्या मनशान ‘तो बरो मनीस आं’ हें वाक्य समाजांतलो दरेकलो आपले विशीं उलयतलो, अशें कर्तृत्व दाखोवपाक जाय.
जमतलें आमकां?