भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें मार्केटांतली पालिकेच्या मालकेची दुकाना परस्पर तिसरे व्यक्तीक भाड्यान दिल्ल्याचें उक्ताडार आयलां. पालिका मुख्याधिकाऱ्यान अशीं सुमार 309 दुकाना खाली करपा संबंदीची निमणी नोटीस मूळ भाडेकाराक दिवन 30 दिसां भितर ही दुकांना खाली करपाक सांगलां.
पालिके कडेन भाडें कबलातीचें नूतनीकरण करनास्तना तिसरे व्यक्तीक दुकान भाड्यान दिल्ल्या दुकान आनी गाड्यांच्या मूळ भाडेकाराक फाटल्या फेब्रुवारी म्हयऩ्यांत मुख्याधिकाऱ्यान कारण दाखयात नोटीसो धाडिल्ल्यो. दुकानां आनी गाळेवजा दुकानां पयलीं कळयनास्तना कित्याक काडून घेवची न्हंय हाचें स्पश्टिकरण पुराव्यां सयत दिवपाक ताकां सांगिल्लें.
ते उपरांत मुख्याधिकारीअमितेश शिरवयकारान हे संबंदी वैयक्तीक सुनावणी घेतिल्ली. त्या वेळार मूळ भाडेकारान पालिकेक काळखांत दवोरून मूळ कबलातेल्यो अटी आनी गोंय पालिका कायद्याचें उल्लंघन करून तिसरे व्यक्तीक दुकानां भाड्यान दिल्ल्याचें दिसून आयिल्लें. शिवाय मूळ भाडेकारान आपल्या दुकानाच्या कबलातीचें नूतनीकरण करूं ना हें दिसून आयिल्लें. अनधिकृत व्यक्तीन पालिकेच्या मालमत्तेचेर कब्जा केल्ल्यान गोंय पालिका कायद्याचें उल्लंघन केल्ल्याचो ठपको दवोरून 30 दिसां भितर दुकानां खाली करची वा पालिका मंडळ ताका सील लायतले अशी शिटकावणी दिल्या
कारवाय करपाची नोटीस मेळ्ळ्या उपरांत संबंदीत दुकानदार अस्वस्थ जाल्यात. भाडेकारांच्या एका शिश्टमंड़ळान म्हापश्याचो आमदार आनी उपसभापती जोशुआ डिसोझाची भेट घेवन हस्तक्षेप करपाची तांका विनवणी केल्या. मुख्याधिकारी सद्या रजेर आसा. तो कामार येतगीर जोड बसका घेवपाचें आस्वासन डिसोझान दुकान भाडेकारांक दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
