भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें पालिका मंडळान मार्केटा सामकार आशिल्ली पोरणी झाडां मारून सैमाचें लुकसाण केलां. ते खातीर रानां खात्यान तांचे आड कागाळ करची अशी मागणी आदलो नगरसेवक तुषार टोपले हाणे केल्या.
दर वर्सा पावसा पयलीं ह्या झाडांचे खांदे कापताले. मात अदूं झाडां अर्दीं मारून वडयल्यांत. ह्या झाडांक लागून ज्ञानप्रसारक विद्यालयांतले विद्यार्थी, शिक्षक, पालक तशेंच वेपारी आनी साबार लोकांक सावली मेळटाली, तांची कत्तल केल्ल्यान ताकां वत पावसांत रावचें पडटलें अशें टोपले हाणे एका प्रसिद्धी पत्रकांत म्हणलां.
ह्या झाडांचेर शेंवण्यांचे घोटेर आशिल्ले. तांची नासधूस करून शेवण्याक पालिका मंडळान उबंतर वडयलां. साबार लोकांक झाड मारपा खातीर रानां खात्याचो परवानो घेवक सक्तीचें आसा मात भरवस्तींत आशिल्ली हीं झाडां मारपाक रानां खात्या कडल्यान परवानगी घेतलीना असो दावो टोपले हाणे केला. बार्देशाच्या उपजिल्होधिकऱ्या कडल्यान खांदे मारपाचो परवानो घेवंन बेकायदेशीरपणान झाडाची पालिका मंडळान कत्तल केल्या, ह्या प्रकरणांत जो कोण आसा ताचेर रानां खात्यान गुन्यांव नोंद करचो अशे ताणे सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
