म्हापशें पालिका प्रशासकीय इमारत प्रकल्पः सेंटरींगाच्या खांब्यांक कळम

भांगरभूंय | प्रतिनिधी

म्हापशें, प्रतिनिधी ः म्हापशें पालिकेच्या नव्या प्रशासकीय इमारत प्रकल्पाचें बांदकाम साडेतीन वर्सां सावन उरलां. पालिका कार्यालयाच्या आवारांत आशिल्ल्या प्रकल्पाच्या सेंटरींगा खातीर वापरिल्ल्या लोखणाच्या खांब्यांक कळम आयल्या आनी ते इबाडल्यात, जाका लागून हे खांब मोडून अपघात जावपाची शक्यताय आसा.
सध्याचें पालिका मंडळ अस्तित्वांत आयले उपरांत ह्या प्रशासकीय विभाग प्रकल्पाचो बुन्याद फातर डिसेंबर 2021 वर्सा घालो. 2.97 कोटी खर्चाचो हो पालिका प्रकल्प म्हत्वाचो आसा. पूण एका वर्सा भितर पुराय करपाच्या हेतान सुरू केल्लो हो तीन माळयेचो प्रकल्प तीन वर्सां चार म्हयने जाले तरी लेगीत पुराय जावंक ना. जाल्यार फाटल्या 10 म्हयन्यां सावन कंत्राटदारान प्रकल्पाचें बांदकाम बंद दवरलां.
इमारतीच्या पयल्या माळयेच्या छप्पराक आनी सोपणांच्या सेंटरींगा खातीर लायिल्लें लोखणाचे खांब तशेंच आसात आनी सध्या ते कळमेल्यात. हे खांबे मोडपाचो धोको आसा. कामाक लागून पालिका कार्यालयांत व्हड प्रमाणांत लोक येतात. ते कार्यालयांच्या फाटल्यान आपल्यो गाडयो पार्क करतात. अशे परिस्थितींत हे खांबे मोडले जाल्यार ह्या सुवातेर व्हड दुर्घटना घडूंक शकता असो भंय कर्मचाऱ्यांनी उक्तायला. मजगतीं सध्याच्या पालिका इमारतींत फावो ती सुवात ना. हाका लागून कर्मचारी तशेंच लोकांचीय गैरसोय जाता. सुवात नाशिल्ल्यान फायली जनेलांचेर, कॉरिडोरांत आनी जंय मेळटात थंय दवरचीं पडटात. इतलेंच न्हय तर पालिका सभाघरांची क्षमताय ल्हान आशिल्ल्यान पालिका मंडळाच्यो बसका घेवपाक आडखळ निर्माण जाता.
हाका लागून 2017 वर्सा पालिका मंडळान बरें सभाघर आनी फावो ती सुवात नाशिल्ल्यान उपाय म्हणून नव्या प्रशासकीय इमारतीक मान्यताय दिल्ली. मागीर तळघरांत पार्किंगाची सुविधा, पयल्या माळयेर दुकानां आनी कार्यालय तशेंच कॅन्टीन. दुसऱ्यां माळयेर पालिका मंडळाच्या बसके खातीर सभाघर आसपावीत आशिल्ल्या ह्या प्रकल्पाचें बांदकाम 6 डिसेंबर 2021 सावन सुरू जाल्लें.
मजगतीं, हो प्रकल्प बेगीनांत बेगीन पुराय करपाचे यत्न पालिके कडल्यान सुरू आसात. शिवम इंफ्राटेक हे कंत्राटदार कंपनीन फुडल्या 15 दिसां भितर बांदकाम सुरू करपाची हमी दिल्या अशी म्हायती पालिका अधिकाऱ्यांनी आनी पालिका मंडळान दिल्या.