भांगरभूंय | प्रतिनिधी
शिवसेनेची मागणी : मुख्य अभियंत्याक भेटयलें निवेदन
भांगरभूंय । खबरां मेज
पणजी : म्हापशें शार ते पर्वरी आझाद भवना मेरेनचो पर्यायी रस्तो (सर्वीस रोड) फोंडकुलांनी भरला. ताकतिकेन ते रस्तो दुरुस्त करचो अशी मागणी गोंय राज्य शिवसेने वतीन केल्या. बुधवारा सांजे वेळार आल्तीन पणजेच्या भौशीक बांदकाम खात्याच्या कार्यालयांत मुख्य अभियंतो दत्तप्रसाद कामत राज्य मुखेली उपेंद्र गांवकार हांच्या शिश्टमंडळान भेट घेवन तांकां निवेदन सादर केलें. ह्या वेळार राज्य सचीव काशिनाथ मयेंकार, उत्तर जिल्हो मुखेली सुनील सांतिनेझकार, दक्षीण जिल्हो मुखेली गणबा देसाय, फोंडें म्हाल मुखेली प्रताप नायक हे पदाधिकारी हाजीर आशिल्ले.
म्हापशें ते पर्वरी मेरेन येरादारी करतना खूब अडचण जाता. उड्डाण पुलाचें काम चालू आशिल्ल्यान थंय येरादारीची कोयंडी जाता. प्रत्यक्ष काम चालू आसतना पर्यायी रस्तो वेवस्थीत दवरप ही संबंदीत कंत्राटदाराची लागणूक, पूण थंय त्या कंत्राटादारा कडल्यान घाळपणां चल्ल्यांत, अशें गांवकार हांणी नदरेक हाडून दिलें.
पुराय रस्त्याची चाळण जाल्ल्यान लोकांक खूब समस्यांक फुडो करचो पडटा. चड करून कामा निमतान वचपी लोकांक जीव मुठींत धरून थंयच्यान वच्चें पडटा. थंय आयज मेरेन खूबशे अपघात जाल्यात. कांय जाणांक जीव लेगीत वगडावचो पडला. भौशीक बांदकाम खात्यान ह्या प्रकरणांत लक्ष दिवचें, अशी मागणी मयेंकार हांणी केली.
मुख्य अभियंतो कामत हांणी शिवसेनेचे हे मागणेची नोंद गेवन संबंदीत कंत्राटदार कडेन फोना वयल्यान संपर्क करून पर्वरी सर्वीस रस्तो ताकतिकेन दुरुस्त करपाचो आदेश दिलो, अशी म्हायती उपेंद्र गांवकार हांणी दिली. म्हापशें- पर्वरी सर्वीस रस्तो ताकतिकेन दुरुस्त करचो, ना जाल्यार शिवसेना ह्या प्रकरणांत आपले स्टायलीन आंदोलन करतली, अशी शिटकावणी शिवसेनेन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
