भांगरभूंय | प्रतिनिधी
सुवात उणी आशिल्ल्यान गोमॅकाँत धाडच्यो पडटात कुडी
म्हापशें: उत्तर गोंय जिल्हो हॉस्पिटलांतल्या मड्या कुडींतले कांय युनिट्स नादुरुस्त जाल्ले आसून सुवात उणी आशिल्ल्यान कुडी गोमॅकाँत धाडच्यो पडटात. हाका लागून लोकांची गैरसोय जाता. जीएसआयडीसी वतीन हाचें नुतनीकरण करतले अशी म्हायती गोंय मुळाव्यो साधन सुविधा म्हामंडळाचे अध्यक्ष आनी कळंगूटचे आमदार मायकल लोबो हांणी दिली.
काल (मंगळारा) आमदार मायकल लोबो आनी उपसभापती आनी म्हापशेंचे आमदार ज्योशुआ डिसोझा हांणी जिल्हो हॉस्पिटलाच्या मड्या कुडीची पळोवणी केली. ह्या वेळार हॉस्पिटलाचे अधिक्षक डॉ. वर्षा मूंज आनी हेर अधिकारी हाजीर आशिल्ले.
आमदार मायकल लोबो हांणी म्हणलें, जिल्हो हॉस्पिटलांतल्या मड्या कुडीचे समस्ये विशीं आमी मुख्यमंत्री आनी भलायकी मंत्री हांचे कडेन चर्चा केल्या. ह्या कुडीचें आधुनीक पद्दतीन नुतनीकरण करून अद्ययावत करतले. वाडटे मागणीची पुर्तताय करपा खातीर 20 कर्म्पाटमेंट आशिल्ली नवी मड्या कूड उबारपाची येवजण आसा. कारण मड्या कुडीची सुविधा दर सात-आठ वर्सांनी अद्ययावत करपाची गरज आसता.
उपसभापती ज्योशुआ डिसोझा हांणी म्हणलें, मड्या कुडीची उण्यां तांकीक लागून लोकांची गैरसोय जाता. 14 वर्सां पयलीं बांदिल्ले 12 कर्म्पाटमेंट आसून सगले वेवस्थीत चलतात. पूण वाडटे मागणीक लागून ही संख्या वाडोवपाची गरज आसा. हॉस्पिटलांत रेखडीच नव्या सिटी स्कॅन मशिनाची वेवस्था करतले अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
