म्हापशेंतल्या बागेंतलो कोयर ब्रिकेट प्रकल्पाक

भांगरभूंय | प्रतिनिधी

म्हापशें पालिकेचो निर्णय

म्हापशें : ह्या शाराक सध्या कोयराची समस्या सतायता. ह्या कोयरांत घन कोयर तशेंच बागेंतल्या कोयराचो आस्पाव जाता आनी म्हापसा पालिकेन साळगांवांतल्या बायोमास ब्रिकेट प्लांट नांवाचे कंपनी वरवीं हो बागेचो कोयर विलो लावपाची प्रक्रिया सुरू केल्या.
प्रेस उर्जा प्रा. लि. लिमिटेड कंपनीन दिसाक 40 टन क्षमता आशिल्लो ब्रिकेटिंग प्लांट स्थापन केला. हो प्रकल्प डिझायन, बिल्ड, ऑपरेट, फायनान्स आनी ट्रान्सफर (डीबीओएफटी) ह्या आदाराचेर स्थापन केला. ह्या प्रकल्पा खातीर गेडान 3250 चौखण मिटर जमीन दिल्या. सध्या ह्या प्रकल्पाचो उपेग राज्यांतल्या कांय थळाव्या संस्थांनी बागेंतल्या कोयराच्या विलो लावपा खातीर करतात.
साळगांव बायोमास ब्रॅकेटिंग प्लांटांतल्या सुविधांचो वापर म्हापशेंतल्या बागांतलो कोयर उडोवपा खातीर करचो अशी विनंती गेडा कडल्यान पालिकेक पत्रा वरवीं केल्ली. हो प्रकल्प सगळ्या प्रकारच्या बागेंतल्या कोयराचेर, सुक्या नाल्लाचो कोयर, पानां आनी हेर संबंदीत कोयराचेर प्रक्रिया करता आनी जळणा खातीर ब्लॉक तयार करता. बागेचो कोयर एकठांय करपा वांगडाच ह्या कोयराचेय प्लांट दुडू फारीक करता.
म्हापसा पालिका वाठारांत दर म्हयन्याक सुमार आठ ते धा ट्रक बागेचो कोयर तयार जाता आनी सध्या हो कोयर भोंवतणी पडला, जाका लागून पालिकेक विलो लावपाक समस्या निर्माण जाल्या. वयल्या प्लांटाचो फायदो पालिकेन घेतलो जाल्यार ह्या कोयराची समस्या कायमची सुटावी जातली अशें पालिका मंडळाचें मत आसा.

पालिका निर्णय घेतली
शाराचो कोयराची समस्या सोडोवपाक आमी एके खाजगी कंपनी पळयल्या, जंय बागेंतल्या कोयराचेर प्रक्रिया करतात. इतलेंच न्हय तर ही कंपनी कोयराक पयशे फारीक करता. शारांत निर्माण जाल्लो कोयर हे कंपनीक दिवपाचो विचार पालिके कडल्यान सुरू केला आनी हे विशीं पालिके बेगोबेग निर्णय घेतले अशी म्हायती नगराध्यक्ष प्रिया मिशाल हांणी दिली.

कंपनीक भेट
बागेंतल्या कोयराची समस्या सोडोवपाक आमी सालगांवांतल्या एका कंपनीक भेट दिली. ही कंपनी कोयराची दुडवा वरवीं परतफेड करता देखून पालिकेचेर कसलोच भार पडचो ना. तशेंच कोयर येरादारी खातीर लागपी इंधन खर्च कंपनी कडल्यान मेळिल्ल्या पयशांनी भरून काडटले. ही म्हायती उपनगराध्यक्ष प्रकाश भिवाशेत हांणी दिली.