भांगरभूंय | प्रतिनिधी
पावसा पासून राखण दिवपाचो भौशीक बांदकाम विभागाचो उपाय
भांगरभूंय । प्रतिनिधी
म्हापशें : म्हापशें सरकारी संकूल इमारतीची गळटी आडावपा खातीर पाख्याचेर ताडपत्री घातल्या पावसाळ्या पासून राखण म्हूण हो तात्पुरतो उपाय भौशीक बांदकाम विभागान केला.
फाटल्या सप्तका सावन सुरू जाल्ल्या पावसाक लागून दुरुस्ती खातीर घेतिल्ले हे सरकारी संकूल इमारतींत पोंवपाक लागिल्लें. हे गळटीचो परिणाम नगरनियोजन, कामगार, आयुक्त, कर आनी भौशीक बांदकाम खातें हांच्या कार्यालयांचेर परिणाम जाल्लो. सोमारा 26 मेक हे गळटेक लागून वीज उपकरणां भिजिल्लीं, आनी वयल्या कार्यालयांतले कंप्युटर तशेंच हेर उपकरणांक लागून कर्मचाऱ्यांक विजेचो शॉक लागिल्लो. हाचेर उपाय म्हूण सध्या भौशीक बांदकाम खात्याच्या इमारत विभागान संकुलाच्या पुराय पाख्याचेर ताडपत्री घातल्या.
मजगतीं, हे इमारतीचें पाखें जीर्ण जाल्ल्यान चालू म्हयन्याचे सुरवेक भौशीक बांदकाम खात्यान पाख्याचे दुरुस्तीचें काम हातांत घेतिल्लें. पाख्याचेर वॉटर प्रुफींग करपा खातीर नळे काडिल्ले. ते आदीं पाख्याचे जीर्ण जावन कोसळपी भागाचेर सिमेंट काँक्रीट घालपाचें काम केल्लें. मात ते उपरांत आडवेळो पावस सुरू जालो आनी वॉटर प्रुफींग आनी नळें घालपाचें काम आडकलें. ताका लागून पाख्याक गळटी लागिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
