भांगरभूंय | प्रतिनिधी
म्हापशें: म्हापशेंच्या श्रीलक्ष्मी नारायण संस्थानान ड्रेस कोड लागू करपाचो एक म्हत्वाचो निर्णय घेतला. देवळाचें पावित्र्य आनी सात्विकताय तिगोवन दवरपाक वेवस्थापन समितीन देवळांत प्रवेश करपी सगल्या भाविकां खातीर विशिश्ट ’ड्रेस कोड’ लागू केला. हे नेम मोडप्यांक देवळांत प्रवेश दिवचे नात. तश्या आशयाचे तक्टेय लायल्यात.
संस्थानान जाहीर केल्ल्या नेमां प्रमाण, भाविकांनी देवळांत येतना भारतीय संस्कृतीक सोबसारके आनी सभ्य कपडे घालप गरजेचें आसा. मोटवे कपडे घालून येवपी पर्यटकांचेर आनी भाविकांचेर निर्बंध घातल्यात. हातूंत शॉर्ट्स, मिनी स्कर्ट, मिडी, स्लिव्हलेस टॉप, लो वेस्ट जीन्स आनी मोटवे टी-शर्ट घालप्यांक देवळांत घेवचे नात. देवळाच्या वाठारांत वावुरतना थंयच्या आध्यात्मीक वातावरणाचो भंग जावचो न्हय हो हे फाटलो मुखेल हेतू आशिल्ल्याचें समितीन म्हणलां.
हालींच्या काळांत जायते भावीक आनी पर्यटक मंदिराच्या नेमां कडेन आडनदर करून आधुनीक आनी ल्हान कपड्यांनी प्रवेश करतना दिसले. हाका लागून देवळाचें पावित्र्य इबाडलें अशी कागाळ खुबश्या भाविकांनी केल्ली. हेच फाटभूंयेर वेवस्थापन समितीन हो खर निर्णय घेतला. देवळाच्या प्रवेश दाराचेर ह्या नेमांची म्हायती दिवपी तक्टो लायला. ह्या निर्णयाक थळाव्या भाविकांनी येवकार दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
