भांगरभूंय | प्रतिनिधी
म्हापशें पालिकेचे दायज इमारतीच्या जिर्णोद्धाराचो वावर फुडल्या सप्तका सावन
भांगरभूंय । प्रतिनिधी
म्हापशें: म्हापशें पालिकेचें आताईद वाचपघर तीन वर्सां आदीं लोकां खातीर बंद केल्लें. पालिकेचे हे पोरणे दायज इमारतीच्या जिर्णोद्धाराचें काम फुडल्या सप्तकांत हातांत घेतले. ह्या कामाचेर सुमार 3.8 कोटी रुपया खर्च करतले. कंत्राटदाराक वर्क ऑर्डरूय दिल्या, अशी म्हायती मेळ्ळ्या.
शंबर वर्सां आदली ही दायज इमारत मोडपाक पाविल्ल्यान 13 सप्टेंबर 2019 ह्या दिसा तिका कुलप मारिल्लें. तेच वांगडा पालिकेचें आताईद वाचपघर लेगीत बंद जाल्लें.
गोंय राज्य नागरी विकास एजन्सी वती (जी सुडा) हे दायज इमारतीच्या जिर्णोद्धाराचें काम करतले. तीन म्हयन्यां आदीं निविदा काडिल्ली आ योग्य बोलीदाराक काम करपाचो आदेश दिला. ह्या वाचपघराचें काम दर्जेदार आ ई- वाचपघरा प्रमाण रचना आसतली.
जिर्णोद्धार येवजणे प्रमाण तळमाळ्यार ज्येश्ठ नागरिकां खातीर वाचन सुविधा सयत वाचपघर विवीध विभागांनी वांट्टले. टायल्स फ्लोरिंग आनी फर्निचर कामा सयत पुराय इमारतीची दुरुस्ती प्लास्टर आनी रंग मारतले.
म्हापशें पालिकेचे दायज इमारतीच्या नुतनीकरण प्रकल्पाचो आमी कामाचो आदेश जारी केला. फुडल्या सप्तकांत प्रकल्पाक सुरवात करतले. सगळ्या आधुनीक सुविधां सयत इमारतीचें काम करतले. वाचकां खातीर हें दर्जेदार वाचपघर आसतलें. हो प्रकल्प स म्हयन्यांत पुराय जातलो, असो अदमास आसा, अशी म्हायती अधिकाऱ्यांनी दिली.
पालिकेचे मालकीचें आसतलें वाचपघर
आताईद वाचपघर बंद जायत सावन सध्या म्हापश्यां वाचपघर नाशिल्ल्यान शारांतल्या तशेंच बार्देस म्हालांतलो वाचक आनी विद्यार्थ्यांची गैरसोय जाता. ह्या वाचपघरांत पुर्तुगेज काळा सावन इतिहासीक एस्तावेज आनी पुस्तकांचें भांडार आशिल्लें. सुरवेक ही इमारत जिल्हो वाचपघरा खातीर कला आनी संस्कृती खात्या कडेन दिवपाचें थारायिल्लें. पूण उपरांत ही येवजण रद्द करून पालिकेन आपले वतीन इमारतींत वाचपघर सुरू करपाचो निर्णय घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
