भांगरभूंय | प्रतिनिधी
म्हापशें : देव बोडगेश्वर देवस्थान समितीचे वेंचणुकेंत ॲड. वामन पंडित हांची अध्यक्षपदाचेर निवड जाली. तांणी सध्याचे अध्यक्ष आनंद भाईडकार हांकां हारयले. वट्ट आठ वरां परस चड काळ मतमेजणी चल्ली. हे वेंचणुके वेळार महाजनांचो बरो प्रतिसाद मेळ्ळो. वट्ट १४१६ मतदारां मदल्या ११८९ महाजनांनी मतदान केलें.
मजगतीं, बार्देस म्हालांतल्या ३४ मदल्या ३२ देवस्थान समितींची निवड विरोधा विणें जाली. तशेंच कांदोळेच्या श्रीशांतादुर्गा देवस्थानाची वेंचणूक कोरमाच्या उणावाक लागून मुखार धुकल्ली.
येवपी तीन वर्सांच्या काळा खातीर ही वेंचणूक शांतीकायेन जाली. म्हालांतल्या ३२ देवस्थानांच्या नव्या समितींची निवड महाजनां कडल्यान विरोधाविणें जाली. म्हापशेंच्या श्रीदेव बोडगेश्वर संस्थानाच्या कार्यकारी मंडळांत फूट पडून सध्याचे अध्यक्ष आनंद भाईडकार, सचीव ॲड. वामन पंडित आनी आदले अध्यक्ष ॲड. महेश राणे हांचे तीन पॅनल हे वेंचणुकेंत देंविल्ले.
श्रीबोडगेश्वर देवस्थानाची वेंचून आयिल्ली नवी समिती
अध्यक्ष: वामन पंडितस उपाध्यक्ष- अमेय कोरगांवकार, सचिव- हरिश्चंद्र गांवकार, भांडारी- श्यामसुंदर पेडणेंकार, सहसचिव- कुणाल धारगळकार, उपभांडारी- विशांत केणी, मुखत्यार- राजेंद्र पेडणेंकार, उपमुखत्यार- साईनाथ रावळ
शांतिकायेन जालें मतदान
बोडगेश्वर सभाघरांत वेंचणुकेचे सुवातेर महाजनांनी सकाळ सावन मतदानाची बरीच व्हड रांक लायिल्ली. वट्ट १४१६ मतदार महाजनां मदल्या ११८९ मतदारांनी मतदान केलें. मजगतीं, नव्यान आसपाव केल्ल्या २५४ महाजनांक लागून आपलो गट हारिल्ल्याचो आरोप विरोधी गटान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
