भांगरभूंय | प्रतिनिधी
निखिलचंद्र खलप : सहकार नवजीवन पॅनलाची घोशणा
भांगरभूंय । प्रतिनिधी
म्हापशें : बार्देस बाजाराक परतून नवजीवन मेळचें ह्या नितळ हेतून आनी दूरदिश्टीन आमी महादेव नाटेकार हांच्या फुडारपणा खाला पॅनल उबें केलां. वट्ट बारा उमेदवार आमी रिंगणांत देंवयलां. बार्देस बाजार हे संस्थेक थिरताय मेळची हें आमचें मुखेल उदिश्ट आसा. आमचें पॅनल जिखून आयलें जाल्यार सगल्यांत पयलीं वेवस्थापकी संचालकाची नेमणूक करतले आनी बार्देस बाजाराचे मॉल संकल्पनेक डिसेंबर मेरेन चालना दितले. गोंयांतले दर घर आनी खाची कोनश्या मेरेन बार्देस बाजार ई-कॉमर्साच्या माध्यमांतल्यान पावोवपाचो आमचो हांवेस आसा. तशेंच बार्देस बाजाराचें स्वताचो उत्पादन ब्रॅण्ड सुरू करून ताची विक्री करतले, अशें निखीलचंद्र खलप हांणी सांगलें.
सहकार नवजीवन पॅनला विशीं म्हायती दिवपा खातीर आपयिल्ले पत्रकार परिशदेंत खलप उलयताले. ह्या वेळार प्रा. रवींद्र फोगेरी, एकनाथ नागवेकार, विजय भिके आनी सुधीर कांदोळकार हाजीर आशिल्ले.
खलप हांणी सांगलें, फाटलीं कितलीशींच वर्सां बार्देस बाजाराचें भागभांडवल आशिल्लें तशेंच आसा. हे खातीर वयली संकल्पना चालीक लायतले. जे वरवीं संस्थेक नवजीवन दिवपाचो आमी यत्न करतले. ते भायर दुसरी नेतृत्व फळी तयार करतले. ते लोक हाचे फुडें बार्देस बाजाराची जापसालदारकी घेतले.
बार्देस बाजार गिरायक सहकार सोसायटीच्या संचालक मंडळाचे वेंचणुकेंत महादेव नाटेकार हांच्या फुडारपणा खाला सहकार नवजीवन हो पॅनल रिंगणांत देंवला. ह्या पॅनला वरवीं 12 उमेदवार वेंचणुकेंत उबे केल्यात. तातूंत 8 नवीं मुखामळां आसात. ही वेंचणूक 5 ऑक्टोबराक म्हापशें उपनिबंधक कार्यालयांत जातली.
ह्या सहकार नवजीवन पॅनलांत महादेव नाटेकार, प्रा. रवींद्र फोगेरी, एकनाथ नागवेकार, नारायण राटवड, प्रमोद कर्पे, निखिलचंद्र खलप, सखाराम गांवकार, सुधीर कांदोळकार, नितीन नायक, विजय भिके हे सगले उक्त्या गटांतले उमेदवार जाल्यार बायलां खातीर राखीव गटांत निर्मला खलप आनी डॉ. प्रतिक्षा खलप ह्या दोगींचो आस्पाव आसा.
ह्या वेळार . रवींद्र फोगेरी, एकनाथ नागवेकार, विजय भिके आनी सुधीर कांदोळकार हांणी आपले विचार मांडले. मजगतीं, हे वेंचणुकेंत गोंयांतल्या 9 म्हालांतले 2556 मतदार मतदान करतले. तातूंत बार्देसांतले 2108 मतदार आसात. बार्देस बाजाराच्या संचालक मंडळाच्या 15 तल्या 14 सुवातां खातीर ही वेंचणूक जाता. हें वेंचणुकेंत सर्वसादारण गटांतल्या 12 पदां खातीर 19 उमेदवार जाल्यार दोन बायलाच्या राखीव पदां खातीर 4 उमेदवार अशे वट्ट 23 उमेदवार रिंगणांत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
