भांगरभूंय | प्रतिनिधी
म्हापशें : म्हापशेंच्या बार्देस उपनिबंधक कार्यालयांतल्यान जमनीचीं तीन विक्रीपत्रां (सेल डीड) चोरयेक गेल्यांत. हे विशीं उपनिबंधक ऋषिक नायक हांचे कागाळीच्या आदाराचेर म्हापशें पुलिसांनी अनवळखी दुबाविता आड गुन्यांव नोंद केला.
म्हापशेंच्या उपनिबंधक कार्यालयांतल्यान मे आनी जून २०२४ त विक्री वेव्हार जाल्ल्यो जमिनींच्यो तीन सेल-डीड फायली गायब जाल्यात. हो प्रकार लक्षांत येतांच उपनिबंधक नायक हांणी फाटल्या ३ सप्टेंबराक म्हापशें पुलीस स्टेशनाचेर लेखी कागाळ दिल्ली. ते प्रमाण पुलिसांनी भारतीय न्याय संहितेच्या ३८० कलमा खाला अनवळखी दुबाविता आड गुन्यांव नोंद केला.
मजगतीं, उपनिबंधक कार्यालयांतल्यान ह्यो फायली ना जाल्ल्यान हातूंत भितरलेच भेदी आसात, असो दुबाव आसा. हो प्रकार उक्तडार आयिल्ल्यान पुलिसांकूय अजाप जालां. पुलीस निरीक्षक निखिल पालेकार हांच्या मार्गदर्शना खाला म्हापशें पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
