भांगरभूंय | प्रतिनिधी
इमारतीच्या पाख्याचें बेकायदो बांदकाम मोडपाक सुरवात
भांगरभूंय । प्रतिनिधी
म्हापशें : मरड वाठारांतले प्रेस्टीज आर्केड इमारतीच्या 6 व्या माळ्याचें बेकायदो बांदकाम केल्लें पाखें मोडपाचें काम निमाणे म्हापशें पालिकेन अतिक्रमण हटाव पंगडाचे मजतीन हातांत घेतलां. ह्या पाख्या वयले पत्रे हुबून बाजारपेठेंत पडटात, अशी कागाळ म्हापशें वेपारी संघटणेन कागाळ केल्ली.
बुधवारा 28 मेक सकाळीं अतिक्रमण हटाव पंगडान हें बांदकाम मोडपाचें काम हातांत घेतलें. ह्या पंगडाक पालिका अभियंते प्रशांत नार्वेकार, कनिश्ठ अभियंतो सुभा आमोणकार, श्रृती हरमलकार, मंथन कासकार, पालिका निरिक्षक शेखर गांवस, अजीत होबळे, वामन पवार, आप्पालाल ताशेवाला, आरीफ मालदार आनी आनंद तलवार हांणी आदार केलो. तशेंच संयुक्त मामलेदार साईश नायक आनी पुलीस उपनिरिक्षक मंगेश पाळणी हांच्या फुडापणा खाला पुलीस बंदोबस्त तैनात आसलो.
बुधवारा 22 मेक प्रेस्टीज आर्केड इमारतीच्या पाख्याचें पत्रे वाऱ्याक लागून हुबपाक लागिल्ले. म्हापशें वेपारी संघटणेन हो प्रकार प्रसार माध्यमां वरवीं पालिकेचे नदरेक हाडून दिल्लो. ते उपरांत रोखडेच पालिकेन इमारतीच्या धनयाक कारणां दाखय नोटीस जारी करून पत्र्यां सयत पाखें मोडपाचो आदेश दिल्लो. ते प्रमाण संबंदीत इमारत धनयान पाख्या वयलें पत्रे काडिल्ले. मात पाखें मोडपाक ते अपेशी थारिल्ले. उपरांत पालिका मुख्याधिकारी चंद्रकांत शेटकार हांणी हें बेकायदो पाखें तशेंच स्लायडींत क्लासाचें बांदकाम 28 ते 30 मे मेरेन मोडपाचो आदेश जारी केल्लो. मजगतीं, 24 जुलय 2024 ह्या दिसा प्रेस्टीज आक्रेड इमारतीच्या पाख्याचे दोन पत्रे हुबून बाजारपेठेंत पडिल्ले. ते उपरांत संभाव्य धोको टळचो हे खातीर 25 जुलयाक वेपारी संघटणेन उपजिल्होधिकारी तशेंच पालिके कडेन कागाळ दाखल केल्ली. ते प्रमाण हे पाखें बेकायदो थारावन पालिका मुख्याधिकारी चंद्रकांत शेटकार हांणी मेसर्स प्रेस्टीज कंन्स्ट्रक्शन आनी ताहीर इसानी हांणी 15 दिसां भितर तें बांदकाम मोडपाचो आदेश दिल्लो. ना जाल्यार पालिके वतीन हें बांदकाम मोडटले आनी ते खातीर लागपी खर्च वसूल करतले, अशीय शिटकावणी दिल्ली. 30 ऑक्टोबर 2024 ह्या दिसा गोंय नगरपालिका कायदो कलम 184 (8) खाला हो आदेश जारी केल्लो. मात फाटले सात म्हयने ह्या आदेशाची कार्यवाही कायदो मोडपी बांदकाम कंपनी वा नगरपालिके कडल्यान जावंक नासली. मात बुधवार सावन अखेर ह्या आदेशाची कार्यवाही सुरू जाल्या.
प्रिस्टीज आर्केड इमारतीचें फाटल्या कांय वर्सांच पत्रे हुबताले. त्या वेळार हें बांदकाम बेकायदो आशिल्ल्याचें दिसून आयिल्लें. ते उपरांत कायदेशीर प्रक्रिया करून आनी जिल्होधिकाऱ्या वतीन अतिक्रमण हटाव पंगडाचे मजतीन बांदकाम मोडपाचें काम सुरू केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
