भांगरभूंय | प्रतिनिधी
टावन वेंडींग समितीचो निर्णय; उपसमिती नेमली
भांगरभूंय । प्रतिनिधी
म्हापशें: म्हापशेंच्या पालिका मार्केटांतल्या पथविक्रेत्यांचें सर्वेक्षण करपाचो निर्णय पालिका नवनियुक्ती टावन वेंडींग समितीन घेतला. ते खातीर एके उपसमितीची नेमणूक केल्या. वाठाराचें सर्वेक्षण करून पथविक्रेत्यांची वळख पटोवपाची जापसालदारकी तिचे कडेन दिल्या.
हालींच नगरविकास खात्यान पालिकेची 27 वांगड्यांची टावन वेंडींग समिती (टीव्हीसी) स्थापन केल्ली. ती समिती पालिका बाजारपेठे कडेन संबंदीत विवीध समस्या सोडोवपा सयत पथविक्रेत्यांचो संवसार चलोवपा खातीर म्हत्वाची भुमिका घेतली.
बुधवारा म्हापशें पालिकेच्या टावन वेंडींग समितीची पयली बसका पालिका मुख्याधिकारी चंद्रकांत शेटकार हांचे अध्यक्षते खाला जाली. ह्या वेळार समितीचे वांगडी आशिल्ले पालिका बाजार समितीचे अध्यक्ष तशेंच नगरसेवक आशिर्वाद खोर्जुवेंकार, वेपारी संघटणेचे अध्यक्ष श्रीपाद सावंत, फुलां मार्केट वेलफेर संघटणेचे अध्यक्ष आसीस कार्दोज, नुस्त्यां मार्केट अध्यक्ष शशिकला गोवेकार आनी समितीचे हेर वांगडी हाजीर आशिल्ले.
बसकेचे सुरवेक अध्यक्ष चंद्रकांत शेटकार हांणी समितीच्या वांगड्यांक समितीची भुमिका स्पश्ट केली. पथविक्रेते वेवसायिकांच्या हक्कांची राखण करप आनी तांचेर अन्याय जावचो ना, हाची जतनाय घेवप ही समितीची भुमिका आसा, अशें तांणी सांगलें. चर्चे उपरांत शारांतल्लया सगळ्या पथविक्रेत्यांचें सर्वेक्षण करून तांची वळख पटोवपाचो निर्णय घेतलो. सर्वेक्षणा उपरांत विक्रेत्यांक वळखपत्र दितले. विक्री वाठार रेखांकीत करून थंय विक्रेत्यांक वेवसाय करचे खातीर सुवात उपलब्ध करून दितले. ते खातीर नुस्तें विक्रेते, वेपारी, भाजी विक्रेते, आपमजत संस्था ह्या सगळ्या प्रतिनिधींचो आस्पाव आशिल्ली एक उपसमिती स्थापन केल्या. सर्वेक्षणा उपरांत ही समिती आपलो अहवाल टीव्हीसी मुखार सादर करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
