भांगरभूंय | प्रतिनिधी
मुख्यमंत्र्यांच्या निदेशा उपरांत येरादारी पुलीस कारवायेच्या मुडार
म्हापशें: टॅक्सी स्टॅण्डा मुखा वेल्या आराम सोडा तशेंच पोरण्या आंतरराज्य बस स्टॅण्डाच्या प्राकारांतली मेकळी सुवात आडावन पार्क केल्ल्या रेन्ट अ बायक दुचाकी आपल्या नियोजीत सुवातेर हालोवपाचो आदेश संबंदितांक म्हापशें येरादारी पुलिसांनी दिला. मुख्यमंत्र्यांच्या निदेशा उपरांत येरादारी पुलीस रोखडेच कारवायेच्या मुडांत आयल्यात.
मंगळारा मुख्यमंत्री डॉ. प्रमोद सावंत हांणी घेतिल्ल्या पालिका मंडळ आनी प्रशासकी अधिकाऱ्यांचे बसकेंत आराम सोडा इमारतीचो प्राकार हो रेन्ट अ बायक दुचाकींनी आडायला आनी ताका लागून लोकांक वाहन पार्किंगे खातीर सुवात मेळनाशिल्ल्याचो मुद्दो उपस्थीत केल्लो. हाचेर येरादारी पुलीस निरिक्षकांनी सदर वाहनांचेर रोखडीच कारवाय करपाचे निदेश मुख्यमंत्र्यांनी दिल्यात. सुमार 500 दुचाकी हे सुवातेर पार्क केल्यात.
ते प्रमाण काल (बुधवारा) सकाळीं येरादारी पुलीस निरिक्षक मार्लन डिसोझा हांच्या फुडारपणा खाला पुलिसांनी भौशीक पार्कींग वाठारांतलीं हीं वेवसायीक वाहनां रोखडींच कुशीक काडून तीं अधिकृत पार्कींग थळार हालोवचीं आनी सुवात रिती करचपाची सुचोवणी दिली. नाजाल्यार आयज (बिरेस्तारा) सावन वाहन धनयांचेर कायदेशीर कारवाय करतले अशे निदेश दिले.
मजगतीं, म्हापशें पालिकेन ही सुवात पे पार्किंगे खातीर अधिसुचीत केल्या. पालिकेन येरादारी पुलिसां वतीन रेन्ट अ बायक वेवसायिकांक तांच्यो गाडयो थंय सावन कुशीक काडपाची सुचोवणी हाचे पयलीं केल्ली. पूण उपरांत पुलिसांनी संबंदितांक नोटिसो दिल्ल्यो. पूण मुखार कारवाय जावंक नाशिल्ली. आतां मुख्यमंत्र्यांच्या निदेशा वेल्यान येरादारी पुलिसांक कारवायेचें अस्त्र वापरचें पडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
