भांगरभूंय | प्रतिनिधी
भांगरभूंय । प्रतिनिधी
म्हापशेंः कामरखाजन- म्हापशेंचो मलनिस्सारण प्रक्रिया प्रकल्प (एसटीपी) मे म्हयन्यांत कार्यान्वीत करपाचें सरकाराचें उदिश्ट आसा. सध्या शारांतल्या चार वॉर्डांत मलनिस्सारण जोडणी दिवपाचें काम सुरू आसा. पयल्या टप्प्यांत म्हापश्यांतल्या 80 टक्के घरां ह्या प्रकल्पाक जोडटले अशी म्हायती बांदकाम मंत्री नीलेश काब्राल हांणी दिली.
बिरेस्तारा सांज काब्राल हांण म्हापशेंचो आमदार आनी उपसभापती जोशुआ डिसोझा हांच्या वांगडा प्रकल्पाची पळोवणी केली. ह्या वेळार म्हापशें पालिका मंडळाची नगराध्यक्ष शुभांगी वायंगणकार, मुख्याधिकारी अमितेश शिरवयकार, पालिका अभियंतो प्रदीप नार्वेकार, उपजिल्होधिकारी गुरुदास देसाय, नगरसेवक विकास आरोलकार, अॅड तारक आरोलकार, मलनिस्सारण म्हामंडळ, जायक आनी एसएमसी इन्फ्रास्ट्रक्चर कंपनीचे अधिकारी हाजीर आशिल्ले.
सरकारान 80 कोटी रुपये खर्च करून म्हापश्यांत मलनिस्सारण प्रकल्प चालीक लायला. घाणयाऱ्या उदकाचेर प्रक्रिया करपी प्रकल्पाचेर 16 कोटी रुपये खर्च केल्यात. तंत्रीत अशेंच मुख्य दारा कडेन केल्ल्या अतिक्रमणाक लागून व्हो प्रकल्पाक आडमेळे आयल्यात. दारा सामकारची 12 मीटराच्या अंतरार रस्त्यार आशिल्ली सगळीं अतिक्रमणा फुडल्या मंगळारा मेरेन काडपाचो आदेश आमी संबंदीत अधिकाऱ्यांक दिला अशें काब्राल हांणी सांगलें. पालिका मुख्याधिकारी अमितेश शिरवयकार, उपजिल्होधिकारी गुरूदास देसाय हांका ह्या अतिक्रमणाच्या प्रश्नांक लक्ष घालपाक काब्राल हाणी सांगलां. संबंदितांनी आपूण जावंन अतिक्रमणा काडलीं ना जाल्यार तीं मातयेभरवण करात. तशेंच मलनिस्सारण कनेक्शनां खातीर लोकांक विस्वासांत घेयात अशी सूचोवणी काब्राल हांणी नगराध्यक्ष आनी नगरसेवकांक केल्या.
कनेक्शना खातीर पयशे
मलनिस्सारण कनेक्शना खातीर म्हापशेंकारांक पयलीं पयशे भरचे पडटले. ते उपरांत म्हयन्याच्या उदका बिलांतल्यान थारावीक प्रमाणात कापून घेतले. सुरवेक सगळीं घरगुती कनेक्शना शुल्क भरून घेवचीं पडटलीं. जांका पयशे भरप जमना तांकां सरकार कनेक्शनां दितलें आनी ताचे पयशे बिलांतल्यान वसूल करतले. मात वेवसायिकांक शंबर टक्के शुल्क भरून कनेक्शन घेवचें पडटले अशें बांदकाम मंत्री नीलेश काब्राल हांणे सांगलें.
घाणयारे उदक प्रक्रिया प्रकल्पाच्या आवाठांतल्या लोकांक कनेक्शन घेवप बंदनकारक आसतले. व्हो पर्यावरणाचो प्रश्न आसा. सध्या साळ आनी म्हापशें न्हंय प्रदूशीत जाल्या. लोक त्या खातीर सरकाराक जापसालदार थारयतात. मात न्हंय प्रदूशणाचो विशय मलनिस्सारण प्रकल्पाच्या माध्यमांतल्यान सुटावो करपाचो आमचो यत्न आसा अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
