भांगरभूंय | प्रतिनिधी
हांव गोंयचो सायबा… हें ‘मजबूर’ सिनेमांतलें गीत सगल्यांनी आयकलां आसतलें. तकलेर सोऱ्याची बाटली दवरून नाचपी प्राणूय दोळ्यां मुखार आयला आसतलो. आमी सगलेच सायब. पोब्र फिदाल्ग. सुशेगाद. म्हापशेंच्या नगरपालिका मार्केंटांतल्या दुकानदारांचे बाबतींत जी कितें बातमी सध्या पातळ्ळ्या, ताचे वयल्यान तर हें पट्टलें. म्हापशेंची पालिका, मूळ भाडेकरू, सध्याचे दुकानदार, न्यायालय, सरकारी यंत्रणा हांचे मदलें हें प्रकरण दुकानदारांक मारक थारता काय पालिका कायद्यांत दुरुस्ती जावन शांत जाता, तें कांय दिसां भितर दिसतलेंच. म्हापशेंच्या मार्केटांत 1029 दुकानां आसात, तातूंतल्या 311 जाणांक पालिकेन न्यायालयाच्या आदेशा वयल्यान ‘कारणां दाखयात’ नोटिशी धाडल्यात. न्यायालय कितें निवाडो दिता ताचेर ह्या इतल्या वर्सांच्या दुकानांचो फुडार थारतलो. ह्या दुकानदारांक परत नव्यान बस्तान बसोवप तशें कठीणूच दिसता. तेन्ना सरकारान हाचेर विचार करचो, अशी विनवणी तांणी आमदाराक केल्या.
म्हापशेंचे पालिकेन मार्केटांत इमारत बांदून भितरलीं दुकानां भाड्याक दिल्यांत. पूण मूळ भाडेकरूंनी तीं दुसऱ्यांक चलोवपाक दिल्यांत. म्हणल्यार ‘सबलीज’ केल्यांत. कांय जाणांनी तर तीं ‘विकल्यांत’, अशेंय आयकूंक येता. ह्या सगल्या दुकानांची धनी म्हापशें पालिका. मागीर तिका काळखांत दवरून तीं परस्पर भाड्यान दिल्यांत वा विकल्यांत काय नगरसेवक (वा हेर कोण) भितर सामील आसात, ताची सरकारी यंत्रणेन बेगोबेग चवकशी करूंक फावो. वास्तविक कायद्यान तशें करपाक मेळना. पूण पुराय राज्यांत तशें जालां. फाल्यां म्हापशें पालिके आड याचिका घालपी जवाहरलाल शेट्ये हांचे वटेन निकाल लागलो, जाल्यार ताचो फटको हजारांनी दुकानदारांक बसतलो, अशें थोड्यांक दिसता. हाचो स्पश्ट अर्थ खो- खो च्या खेळा भशेन एकल्यान दुसऱ्याक आनी दुसऱ्यान तिसऱ्याक दुकान चलोवपाक दिवपाचे प्रकार घडल्यात तर? कांय वर्सां पयलीं सरकारी अध्यादेश आयिल्लो. तेन्ना पालिकेच्या आदेशा वयल्यान वेपाऱ्यांनी दुकानाचेर भाडेकरू म्हूण हक्क सांगपी आपापल्यो फायली पालिकेक सादर केल्ल्यो. उपरांत अचकीत तो अध्यादेश फाटीं घेतिल्ल्यान दुकानदारांचो प्रस्न सुटावो जावपाचो आशिल्लो तो आडकून उरलो. ह्याच फायलींच्या आदाराचेर श्री. शेट्ये हांणी याचिका घाल्या. राज्यांतल्या वेपाऱ्यां कडल्यान वर्साक 100 कोटींची येणावळ सरकाराक मेळटा. तेन्ना सरकाराक मनीसपणाच्या नदरेंतल्यान विचार करचो, अशी ह्या दुकानदारांची मागणी.
पालिके कडल्यान दुकान भाड्याक घेतिल्ल्यांनी जर तीं दुसऱ्याक विकल्यांत, जाल्यार ताची तपासणी जावप गरजेचें. फक्त म्हापश्यांच न्हय, तर पुराय राज्यांत. कांय कडेन एकाच नांवाचीं 4- 4 दुकानां (दोन ते तीन शारांनी) पळोवपाक मेळटात. तींय बंद स्थितींत. हो प्रकार नेमको कितें? तीं आडावन दवरल्यांत, जाल्यार कित्या खातीर? दुसरो कोण तरणाटो तीं चलयतलो आशिल्लो, तोय उबंत उरलो ना? राज्यांतल्या सगल्या पालिकांनी कोणें- कोणें दुकानां भाड्याक घेतल्यांत, कितल्या जाणांनी तीं सबलीज केल्यांत, तीं करपी आनी दुकान भाड्यान घेवपी (दुसरो भाडेकरू) गोंयकार कितले, एका परस चड दुकानां कितल्या जाणांनी घेतल्यांत, कितल्या जाणांनी ती परस्पर विकल्यांत, विकतना (विकत घेतना) सेलडीड वा हेर सरकारी सोपस्कार केल्यात काय नात, दुकानदारांच्यो फायली आसात, तातूंत कसले दाखले, परवाने, अर्ज, पत्रां आसात, ताचेर कोणाची सही आसा, वकील कोण, भाडें- लायटीचें- उदकाचें- कोयराचें बील नेमान भरतात काय थकबाकी आसा….. ह्या सगल्या प्रस्नांचो तपास सरकारी यंत्रणा करपाक शकता? केल्यार बऱ्योच गजाली उक्ताडार येतल्यो. आप- पाप दुकानदारांच्या माथ्यार दवरप अन्यायकारक थारतलें. दुकानां विकल्यांत जाल्यार तीं घेवपी दुकानदार त्रासांत पडटले. तांचे कडेन धनी, भाडेकरू म्हूण कागदां आसचीं पडटलीं. घडये आसतलीं. पूण दुकानां ‘सबलीज’ करपाची तरतूद कायद्यांत आसा?
दुकानां विशीं फुडली सुनावणी 21 मार्चाक. तो मेरेन दुकानदार तणावा खाला आसतले. म्हापशेंचो बाजार हो पुर्तुगेज काळा सावन फामाद. ह्या प्रकरणान ताचे लोकप्रियतेक खत लागचें ना, हाची जतनाय सगल्यांकूच घेवची पडटली. आमी सगलेच बरेच खेपे कायद्याचे उजू वाटेन वच्चे सुवातेर भलत्याच मार्गान वतात. शाॅर्टकट मारतात. ताचे परिणाम मागीर अशे जातात. सध्या म्हापशेंच्या 14 जाणां कडेन वैध भाडें कबलाती आसात. तर 277 जाणांचे लीज नुतनीकरण अर्ज आडकून उरल्यात. पालिकेची यंत्रणा, प्रशासन कायद्यान राविल्लें जाल्यार दुकानदारांचेर हो वेळ येवचो नाशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
