भांगरभूंय | प्रतिनिधी
सुदिन ढवळीकारः थळावी स्वराज्य संस्था चलो मोहिमे वरवीं पालिकेक भेट
भांगरभूंय । प्रतिनिधी
म्हापशें: फुडल्या आठ दिसां भितर म्हापशेंचे खणिल्ले रस्ते आदले भशेन करतले, अशें वीज मंत्री सुदिन ढवळीकार हांणी सांगलें. तशेंच लोकां सयत नगरसेवकांच्यो गाराणीं आयकून घेवन संबंदीत विशय सोडोवपाचें आस्वासन दिलें.
विकसीत भारत खाला गोंयांतल्या मंत्र्यांची थळावी स्वराज्य संस्था चलो मोहीम सुरू जाल्या. हे फाटभुंयेर मंत्री ढवळीकार हांणी बुधवारा म्हापशें पालिकेक भेट दिली. शारांतल्या भुंयगत वीज केबलांच्या कामाक लागून रस्ते वेळार आदले भशेन जायनात, हाचेर मंत्र्यांचें लक्ष ओडलें. ह्या कामाक लागून बाजारपेठेंतली स्थिती सामकीच वायट जाल्ल्याचें म्हणणें ह्या वेळार सगळ्याच नगरसेवकांनी मांडलें.
ह्या वेळार उपसभापती ज्योशुआ डिसोझा, हळदोणेंचे आमदार अॅड. कार्लूस फेरेरा, नगराध्यक्ष डॉ. नूतन बिचोलकार, हेर नगरसेवक तशेंच विविध सरकारी अधिकारी हाजीर आशिल्ले.
सरकारी खात्यान आंतरसंवाद दवरचे खातीर बारचार्टचो वापर करचो. जे वरवीं उदरगतीचीं कामां करतना सर्वसामान्यांक जावपी त्रास उणो करपाक मेळटलो, असो सल्लो मंत्री ढवळीकार हांणी अधिकाऱ्यांक दिलो.
म्हापशें मार्केटांतल्या भुंयगत वीज केबलांच्या कामांक लागून निर्माण जाल्ले स्थिती कडेन नगरसेवक आशिर्वाद खोर्जुवेंकार हांणी मंत्र्याचें लक्ष ओडलें.
मार्केटांतलें अर्द्या परस अदीक काम पुराय जालां. सध्या सर्वीस कनेक्शन करपाचें उरलां. हे रस्ते पालिके खाला येतात, अशें अधिकाऱ्यांनी सांगलें.
रस्ते खणटना कंत्राटदार घाळपणान कामां करतात. हाचो परिणाम म्हणल्यार रस्त्या कुशीचीं गटारां कोसळटात. हाका प्रशासकीय मंजुरी मेळपाक वर्सां लागतात, अशी कागाळ नगरसेवक अॅड. शशांक नार्वेकार हांणी केली. हे फुडें हीं कामां करतना अभियंत्यांनी स्वता लक्ष दवरचें, अशी सुचोवणी मंत्री ढवळीकार हांणी अधिकाऱ्यांक केली. म्हापशें शारांतल्या एका व्हड आस्थापना कडल्यान अतिक्रमण करून भुसारी वेवसाय चल्ला, अशी कागाळ एके बायलेन मंत्र्या कडेन केली. हाचेर पालिका तशेंच थळाव्या आमदारान दखल घेवंक ना, असोय आरोप तांणी केलो. आपूण हातूंत लक्ष घालतां, अशें मंत्र्यान तिका सांगलें.
उदक फिल्टर करून दिवपाची सुचोवणी
आपल्या प्रभागांत पोरूं बांय कोसळिल्ली. हे बांयच्या उदकाचेर खूबशीं घरां निंबून आसात. पूण अजून प्रशासकीय पांवड्यार अपेक्षीत आदार मेळना. फाटल्या अजेड वर्सांत आपल्या प्रभागांत उदरगतीच्या कामां संबंदांत 29 थाराव घेतले, पूण एकूय काम जायना, अशें नगरसेवक डॉ. तारक आरोलकार हांणी सांगलें. हीं कामां पुराय करतले, अशी हमी मंत्री सुदिन ढवळीकार हांणी दिली. तशेंच बांयचो विशय सोडोवचो तशेंच पंप बसोवन, उदक फिल्टर करून तें लोकांक दिवची, अशी सुचोवणी तांणी अदिकाऱ्यांक दिली.
अधिकाऱ्यांची बसका घेवन प्रस्न सोडोवपाचें उतर
नगरसेवक सुधीर कांदोळकार, साईनाथ राऊळ, शुभांगी वायंगणकार, प्रिया मिशाळ, सुशांत हरमलकार, केयल ब्रागांझा हांणी लायटीचे पोरणे खांबे तशेंच रस्त्यांविशींचे प्रस्न उपस्थीत केले. सप्तकभरांत अधिकाऱ्यां वांगडा स्वतंत्र बसका घेवन हे प्रस्न सोडपाचें उतर मंत्री सुदिन ढवळीकरा हांणी दिलें. तशेंच पालिकेंत स्वयंपूर्ण मित्र म्हूण कोणाची नेमणूक केल्या हाची खबर पालिका मंडळाकूच नाशिल्ल्याचें नगरसेविका वायंगणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
