भांगरभूंय | प्रतिनिधी
विठ्ठल रखुमाय देवळांत जाल्ली चोरी, दुबाविताक अटक
भांगरभूंय । प्रतिनिधी
म्हापशें: विठ्ठलवाडी, अन्साभाट म्हापश्यां श्री विठ्ठल रखुमाय देवळांत जाल्ले चोरयेचो तपास म्हापशें पुलिसांनी 24 वरां भितर लायलो. दुबावीत श्रीकांत उर्फ जग्गू पट्टार (35, म्हापशें टॅक्सी स्टॅण्ड, मूळ हुबळी कर्नाटक) हाका अटक केली. दुबाविता कडल्यान चोरयेच्यो सगळ्यो वस्तू ताब्यांत घेतल्यो.
ही चोरी शुक्रारा सकाळीं उजवाडाक आयिल्ली. देवळाच्या सीसीटीव्ही फुटेजींत दुबाविताचो चेरो बंदिस्त जाल्लो. ते वयल्यान पुलिसांनी दुबाविताक शेनवारा सोदून काडलो आनी धरलो. दुबावीत भिकारी आसा आनी तो म्हापशें टॅक्सी स्टॅण्डाचेरूच रावता. ताणें चोरिल्लें रुप्याचें शिवलिंग, पुरयताचो मोबायल आनी पेन ड्रायव्ह मेळून सगळ्यो 50 हजारांच्यो वस्तू जप्त केल्यो. मजगतीं, ही चोरी बिरेस्तारा सांजे वेळार घडिल्ली. श्री विठ्ठल रखुमायच्या एका भक्तान नवी दुचाकी खरेदी केल्ली. ते दुचाकीची पुजा करचे खातीर फिर्यादी पुरयत सुनील नायक देवळा भायर गेल्लो. हे संदीचो गैरफायदो घेवन देव दर्शन घेवपाच्या निमतान आयिल्ल्या दुबावितान गर्भकुडींतल्यो वस्तू चोरिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
