भांगरभूंय | प्रतिनिधी
केंद्र सरकाराच्या नशा मुक्त भारत मोहिमेचो उपक्रम
भांगरभूंय । प्रतिनिधी
म्हापशें: केंद्र सरकाराच्या नशा मुक्त भारत मोहिमने खाला म्हापशेंच्या उत्तर गोंय जिल्हो हॉस्पिटलांतली व्यसनमुक्तीची सुविधा (एटीएफ) राष्ट्राक ओंपली.
ह्या जिल्हो हॉस्पिटलांत व्यसनमुक्ती उपचार सुविधा जानेवारी 2022 सावन चालू आसा. 1500 पर चड दुयेंतींचेर थंय उपचार केल्यात. हें केंद्र भलायकी सेवा संचालनलायाच्या मुकुटांत आनीक एक मानाचो तुरो थारलां.
बिरेस्तारा 9 फेब्रुवारीक केंद्र सरकारान नशा मुक्त भारत मोहिमेच्या फुडाकारान देशभरांतल्या 25 व्यसनमुक्ती उपचार सुविधा राष्ट्राक ओंपल्या. तातूंत उत्तर जिल्हो हॉस्पिटलांतल्या व्यसनमुक्ती उपचार सुविधांचो आस्पाव आसा.
केंद्रीय समाजीक न्याय आनी अधिकारिता मंत्री डॉ. वीरेंद्र कुमार तशेंच गृहराज्यमंत्री नित्यानंद राय हांणी बिरेस्तारा डॉ. आंबेडकर इंटरनॅशनल सेंटर, नवी दिल्ली आयोजीत सुवाळ्यांत 25 व्यसनमुक्ती उपचार सुविधांचो पंगड राष्ट्राक ओंपला.
ह्या सुवाळ्यांत देशभरांतले एटीएफ केंर्दां आभासी (व्हर्च्युयल) पद्दतीन देशांत ओंपली. तातूंत म्हापशें उत्तर जिल्हो हॉस्पिटलाच्या केंद्राचो आस्पाव आसा.
ह्या वेळार जिल्हो हॉस्पिटलांत उत्तर गोंय जिल्होधिकारी मामू हागे, उत्तर गोंय पुलीस अधिक्षकर निधीन वाल्सन, हॉस्पिटलाची अधिक्षक डॉ. वंदना धुमे, ह्या केंद्राचे नोडल अधिकारी डॉ. राजेश धे, डॉ. शाहीन सय्यद आनी डॉक्टर वर्ग हाजीर आशिल्लो. ह्या वेळार अधिकाऱ्यांनी नशा मुक्त मोहिमेचो सोपूत घेतलो. नोडल अधिकारी डॉ. राजेश धुमे हांणी सांगलें, आमची व्यसनमुक्ती सुविधा पुरायपणान नवी आसा. तातूंत अत्याधुनीक उपचार, समुपदेशन, फॅमिली थेरपी हाचे सयत ओपीडी आनी आयपीडी सेवा आतां उत्तर गोंय जिल्हो गोंय हॉस्पिटलांत दुसऱ्या माळ्याचेर मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
