भांगरभूंय | प्रतिनिधी
म्हापशें ः म्हापश्यां शारांत पावसांत हॉटमिक्सिंग घालून करदात्यांचे पयशे काबार करपाचो प्रकार घडलो. हवामान खात्याची शिटकावणी आसून लेगीत डांबरीकरण करतात. हाचे परस दुसरी दुर्दैवी गजाल ना. लोकप्रतिनिधींच्या बोल्सांतले हे पयशे न्हय. हो सरळ भ्रश्टाचार आशिल्ल्यान ह्या सप्तकभरांत म्हापशेंचीं उरिल्लीं कामां जर पुराय जावंक ना जाल्यार आमी दरेका सरकारी खात्यांचेर मोचा व्हरतले, अशी शिटकावणी कॉंग्रेसीचे सरचिटणीस विजय भिके हांणी दिली.
म्हापशेंच्या पक्षाच्या जिल्लो कार्यालयांत आयोजीत पत्रकार परिशदेंत ते उलयताले. ह्या वेळार उत्तर गोंय जिल्लोध्यक्ष विरेंद्र शिरोडकार, उपाध्यक्ष चंदन मांद्रेंकार, गटाध्यक्ष मिताली गडेकार, परेश पानकार, सचिन किटलेकार आनी विशाल गडेकार हे हजर आशिल्ले.
पावसाक लागून सगळ्याकूच लुकसाण जालां. तरी सरकारचें आपत्ती वेवस्थापन आनी सरकारी यंत्रणांक कांयच पडून गेल्लें ना. आपत्तकालीन वेवस्थापन समिती कॅबिनां बसून आशिल्ल्याची टिका भिके हांणी केली.
लोकांक फटोवपी येरादारी पुलिसांचे अधिकार मुख्यमंत्र्यांनी काडले उपरांत रस्त्यावेले पुलीसूच गायब जाल्यात. राज्यात वाहन येरादारी नियंत्रणाचो पेज जाला. रस्त्यांवेल्ल्या खड्ड्यांक लागून तरणाट्यांचे जीव वतात. तांच्या दुख्खांत कॉंग्रेस पक्ष वांटेकार आसा, अशें तांणी सांगलें.
गोंयांत पर्यटक येवपाक भियेतात. कारण तांकां आतां हें पर्यटन थळ असुरक्षित दिसूंक लागलां. कॉंग्रेस सरकाराच्या काळांत पर्यटकांक अभय आशिल्लें. एकाच व्यक्तीक ३५ ते ४० वर्सां वेंचून काडले उपरांत कितें घडटा हें कालच्या पावसान सगल्यांक दाखयलें, अशी टिकाय भिके हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
