भांगरभूंय | प्रतिनिधी
म्हापशेंकारांचे भावनेचें स्थान म्हणल्यार श्रीबोडगेश्वराचें देवूळ. ह्या देवाची जात्रा गोंयभर फामाद. गोंयभरचे लोक हे जात्रेक आपली हाजेरी लायतात. बोडगेश्वर म्हणल्यार राखणदार जो दर एकल्याची राखण करता. लोकांचो ह्या राखणदाराचेर खूब भावार्थ. जितलो हो देव फामाद तितलीच ताची जात्रा. हे जात्रेक कांय जाण बोडगिणीची जात्राय म्हूण वळखतात. जात्रा म्हणली की फेरी ही आयलीच. ही फेरी खूब व्हड. खावपाच्यो वस्तू आसूं वा खेळणीं, कपडे, खाजें आनी जायते मांड हे फेरयेक दिश्टी पडटात. लोकांचो देव बोडगेश्वराचेर खूब भावार्थ. बोडगेश्वराचें देवूळ खूब व्हड आसा. तशेंच सोबीत आनी सुंदर आसा. देवळा लागसारची सुवात तर पुराय पाचवीचार सैमान नटिल्ली म्हणूं येता. थंड आनी शितळ ह्या जाग्यार पाविल्ल्या मनशाक थंयच्यान बेगीन भायर सरचे अशें दिसच ना.
ह्या देवळाचो वास इतलो निसर्ग रम्य वातावरणांत आसा की येतल्या वतल्यांचें लक्ष देवळा कडेन गेले बगर रावना. कांय जाण तर आपली मोटार थांबोवन देवाक पांया पडले बगर मुखार वचनात. म्हापशेंकारांची राखण करपी हो राखणदार. सतत आपल्या भक्तांची वाट पळयता. धादोस जाल्ल्या भक्तांक पळोवन तोवूय तृप्त जाता. लोक ताका आंगवणीचोय देव म्हूण वळखतात. आंगवण पुराय जाली काय लोक ताका केळ्याचो घड अर्पण करतात. लोक भावनेन हांगा दर्शनाक येतात. जितले देवूळ सुंदर तितलोच देवूय सुंदर आसा. वांटकुळेंच तोंड, तकलेक फेटो, हातांत बडी असो ताचो भेस. मनाक ओडलायणो दिसता.
तो एक राखणदार आनी तो पुराय म्हापशेंचें तशेंच म्हपशेंकारांची राखण करता अशे लोक मानतात. सगल्यो अडचणी, दिश्ट बाधा तो पयस करता अशें लोकांचें म्हणणें आसा. शेणिल्ल्याक तो घरा पावयता. वाट चुकिल्ल्याक वाट दाखयता. दुख्खी आशिल्ल्याक सुखी करता आनी रिकाम्या हातान आयिल्ल्याक भरभरून दिवन घरा धाडटा. निरशेल्ल्याची आस, शेणिल्ल्याक ध्यास, देव बोडगेश्वर आसल्यार, जातलीं पयस संकश्टां हजार. ताची महती आनी कीर्त खूब व्हड. दर एकल्याचें मागणें तो पूर्ण करता. आयिल्लीं संकश्टां तो पयस करता.
लोक व्हड संखेन जात्रेक येतात आनी फुलां, फळां देवाक अर्पण करतात. लोक हांगा येवन आंगवणी करतात. आपणाक जें जाय तें मागतात. त्यांच्यो मागण्यो देव बोडगेश्वर पुराय करतलोच हो लोकांचो विस्वास. जात्रे दिसा देवूळ फुलांनी तशेंच लायटींनी सजयतात. येणारो जाणारो मन धादोस करून घरा परतता. देव बोडगेश्वर सगल्यांच्यो इत्सा पूर्ण करूं हेंच देवा लागीं मागणें.
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
