भांगरभूंय | प्रतिनिधी
म्हापशेंः रस्त्यार मदींच गाडी उबी केल्ल्याच्या कारणावेल्यान आयआरबी पुलीस कॉन्सटेबलाक जाब विचारीत तांचे गाडयेची चावी काडून बोवाळ करपी दोड्डा हसन – कर्नाटकांतल्या पांच पर्यटकांक म्हापशें पुलिसांनी प्रतिबंधक कारवाये खाला अटक केली.
हो प्रकार म्हापशेंच्या मारूती देवळा लागसार सोमारक सकाळीं १०.१५ वरांचेर घडलो. म्हापशें येरादारी पुलीस स्टेशना कडेन संलग्न आशिल्ल्या कॉनी मास्कारेन्हास हो आयआरबी पुलीस कॉन्सटेबल पुलीस स्टेशनावेल्यान आपली गाडी घेवन कोलवाळे नियुक्त सेवा स्थळार वतालो.
अटक केल्ल्यां मदीं अनिल राजन गौडा (३३), मनू रंगे गौडा (३०), नवीन स्वामी गौडा (३), सागर रंगे गौडा (२५) आनी अविनाश स्वामी गौडा (२८) हांचो आसपाव आसा. हे सगले दोड्डा, हसन – कर्नाटकाचे.
घडणुके वेळार हुतात्मा चौक हांगा वाहनांची कोयंडी आशिल्ली. हाका लागून मास्कारेन्हस हांणी आपली गाडी घडणुके सुवातेरूच थारायली. हे गाडयेच्या फाटल्यान पर्यटक येताले. गाडी मदींच उबी केल्ल्याच्या कारणा वेल्यान पांचूय दुबावीत आपले गाडयेंतल्यान भायर आयले. तांणी आयआरबी पुलीस कॉन्स्टेबल मास्कारेन्हस हांचे गाडयेच्या हारशाचेर हात मारून ताका जाब विचारलो. तशेंच गाडयेची चावी काडून घेतली आनी आपली गाडी फाटीं घेवन थंयच्यान पळ वचपाचो यत्न केलो.
ह्या वेळार थंय जमिल्ले लोक पुलीस कॉन्सटेबलाचे मजतीक धांवन आयले, तांणी दुबावीत पर्यटकांक चावी परत दिवपाक लायली.
उपरांत हे घडणुकेची म्हायती मेळटांच म्हापशें पुलीस घडणुके सुवातेर दाखल जाले आनी तांणी दुबावितांक ताब्यांत घेतले. तशेंच पांचूय जाणांक प्रतिबंधात्मक कायद्या खाला अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
