म्हान शास्त्रज्ञ सरसी. वी. रामन

भांगरभूंय | प्रतिनिधी

भावंडांनो,
परतून एकदां तुमकां सगळ्यांक दिवाळेचे परबेचीं काळजां सावन परबीं. हे परबेंवरी तुमचे जिणेंत अज्ञानाच्या काळखांतल्यान गिन्यानाचो उजवाड फांकूं आनी तुमीं सदांच तुमचे गिन्याना वरवीं, कले वरवीं पर्जळत उरूं हीच म्हजी प्रार्थना.
भावंडानो, इतिहासांतल्यान म्हान मनशांचो उगडास काडून तांचे सावन प्रेरणा घेतना याद जाता ती जांच्या नांवान आमी विज्ञान दीस पळटात त्या म्हान पदार्थ शास्त्रज्ञ तशेंच गणित तज्ञ सर सी. वी. रामन हांची. तांचे पुराय नांव सर चंद्रशेखर वेंकट रामन. तांचो 7 नोव्हेंबराक जल्मदीस. भावंडांनों अशें म्हण्टात संवसारांत आमचे भोंवतणीं कितलींशींत संशोधनातीं बिंयां शिंवरलेलीं आसतात. तीं बिंयां संशोधनानी रुजोवपाक आमकां जाय ती विशिश्ट नदर. नदरेंतल्यानच आमी भोंवतणच्या समाजाचें हीत पळयतां पळयतां, त्या बिंयांचे रुजवणेंतल्यान घडूंक पावतात संशोधक, विज्ञानीक. सर सी.वी.रामन अशेच आशिल्ले. तांच्या रामन इफेक्टावेल्यानच देसभर आमी विज्ञानदीस पाळटात. 7 नोव्हेंबराक ताचे जल्मदिसा निमतान.. आयज तांचे विशीं थोडीशी म्हायती सांगतां…
सर सी.वी.रामन हे तिरुवनाईकोयल तिरुचिरापल्लींत जल्मले. आवय पार्वती आनी बापूय चंद्रशेखर अय्यर. तांचें शिक्षण विशाखापट्टणमांत सेंट एलोयसीस एंग्लो इंडियन हायस्कुलांत जालें. ताणी माध्यमीक शिक्षण शिश्यवृत्ती मेळोवनूच केलें. 1904 वर्सा रामण मद्रास विद्यापिठांत पदवीदर जाले. 1907 वर्सा विज्ञान शाखेंतल्यान ते पदव्युत्तर जाले. विशेश प्राविण्य मेळोवन ते विद्यापिठांत पयले आयले. तांकां भांगरा पदक फावो जालें.
भावंडांनो, तुमी जाणात ? सर रामणाचेर एनी बिसेंटाच्या उलोवण्याचो खूबच परिणाम जाल्लो. तशेंच रामायण, म्हाभारत, ह्या ग्रंथाचोय तांचेर बरोच प्रभाव पडिल्लो, देखून तांचे बापूय तांकां परदेसांत धाडूंक सोदताले. पुणून तांच्या कुटुंबाच्या दोतोरान रामणाक विदेशांत धाडप योग्य जावचें ना अशें पालकांक सांगलें. उपरांत रामणान मद्रास विद्यापिठाच्या प्रेसिडेंली कॉलेजांत प्रवेश घेतलो.
सर रामणांनी खूब संशोधनां केलीं, जायत्या संस्थांनी मोलादीक वावर केलो. इंडियन फायनान्स संचालनालय कलकत्ता विद्यापीठ, बनारस हिंदू विद्यापीठ, इंडियन असोसिएशन फॉर द कल्टिवेशन ऑफ सायन्स, रामन रिसर्च इंस्टिट्यूट आदी संस्थानीं ते मुखेलपणान वावुरले.
तांचो रामन इफेक्ट संवसारभर गाजलो. लायट स्केटरींग चो सोद दोळे दिपकावपी थारलो. तांणी लायिल्ल्या संशोधनानीं तांकां 1930 वर्सा फिजिक्सा खातीरचो नोबेल पुरस्कार फावो जालो. त्याच वर्सा परतून ह्युजीस पुरस्कारय तांकां भेटयलो. 1929 वर्सा नायट बॅचलर्स जाल्यार 1954 वर्सा भारत रत्न पुरस्कार दिवन भारत सरकारान तांचो भौमान केलो. उपरांत तांकां फ्रॅंकलीन पुरस्कार, 1957 वर्सा लेनीन शांतताय पुरस्कार, मेट्टीयुसी पुरस्कार, रॉयल सोसायटीची फॅलोशीप तांकां भेटयली.
भावंडांनो, सर रामन हांच्या संशोधनांतल्यान, कार्यांतल्यान उर्बा मेळोवन तांचे शिश्य नामनेचे विज्ञानीक विक्रम साराभाय, जी.एन. रामचंद्रन, शिवरामकृष्णन पंचरत्न हांणी विज्ञानीक मळार खूब नामना मेळयली. अशा ह्या म्हान विज्ञानिकाक 21नोव्हेंबराक मरण आयलें भावंडांनो, 7 नोव्हेंबराक तांचे जल्मदिसा निमतान आमीं उगडास काडून तांकां मुजरत अभिवादन करुया हां.. बरें तर..
उल्हासभाई