म्हान योद्धा छत्रपती शिवाजी महाराज

भांगरभूंय | प्रतिनिधी

भारतीय इतिहासांत 19 फेब्रुवारी हो एक म्हत्वाचो दीस. ह्या दिसा आमी म्हान मराठा योद्धा आनी राजा छत्रपती शिवाजी महाराज हांची जयंती मनयतात. गोंयांत लोक जात, पात, धर्म भेदभाव करीनासतना ह्या झुजारी व्यक्तीमत्वाक आदरांजली ओंपपाक ह्या वर्सुकीं सुवाळ्यांत व्हडा उमेदीन सहभागी जातात. ह्या दिसा राज्यभर लोकांमदी आनी खास करून तरणांट्यामदी उमेद आनी उत्साह पळोवक मेळटा.
मराठा साम्राज्याचे संस्थापक आनी म्हान योद्धा छत्रपती शिवाजी महाराजाक आदरांजली ओपपाखातीर प्रत्येक वर्सा 19 फेब्रुवारी दिसा गोंय सरकाराचे म्हायती आनी प्रसिद्धी संचालनालय बांदोडा ग्रामपंचायत, जिल्हा पंचायत सदस्य, कवळे आनी हेर सरकारी खात्यांच्या सहकार्यान फर्मागुडी- फोंड्यां राज्य पांवड्याचेर छत्रपती शिवाजी महाराज जयंती सुवाळो आयोजीत करता. खात्या वतीन दिसभराच्या सुवाळ्या निमतान श्री गणपती देवस्थानाच्या पवित्र प्राकारांत शाळां आनी म्हाविद्यालयीन विद्यार्थ्यांच्या सहभागान विंगड विंगड कार्यकमांचे आयोजन करतात. मानेस्तांचे हस्तुकीं छत्रपती शिवाजी महाराजांच्या पुतळ्याक फुलांहार घालून कार्यक्रमाक सुरवात जाता. धोल- ताशे आनी तुतारीचो नाद आनी गजरान फर्मागुडीचो वाठार दुमदुमून वता. मानेस्तांच्या भाशणां वांगडाच नामनेच्या इतिहासकाराचे छत्रपती शिवाजी महाराजांच्या जीणेचेर विचार आयकुपाची संद मेळटा.
छत्रपती शिवाजी महाराज जयंती निमतान म्हायती आनी प्रसिद्धी खात्या वतीन छत्रपती शिवाजी महाराजांचे जिणेचेर उच्च माध्यमिक आनी महाविद्यालयीन विद्यार्थ्यां खातीर आयोजीत करपात येवपी अखील गोंय नाट्य प्रवेश सर्त आनी आंतर महाविद्यालयीन प्रस्नमंजूशा सर्तीक उपाट प्रतिसाद मेळटा.
फर्मागुडी- फोंडेच्या 19 फेब्रुवारीच्या राज्य पांवड्यावयल्या छत्रपती शिवाजी महाराज जयंती सुवाळ्याची तयारी कमीत कमी धा दीस तरी पयली सुरवात जाता. हो भव्यदिव्य सुवाळो यशस्वी करपा खातीर म्हायती आनी प्रसिद्धी खात्या सयत पर्यटन, भौशीक बांदकाम, शिक्षण अशा खात्यांचें सहकार्य मेळटा. फाटल्या अनेक वर्सां सावन तालुका पांवड्यार लेगीत छत्रपती शिवाजी महाराजांक आर्गां ओपून हो सुवाळो मनयतात. तशेंच राज्यांत साबार कडेन छत्रपती शिवाजी महाराजांची जीण, कार्य आनी पराक्रमा वयल्या इतिहासीक नाटकांचे प्रयोग आयोजीत करतात.
गोंयचेर पुर्तुगीजांनी 450 वर्सां राज्य केले. पोर्तुगीज सत्तेच्या काळांत गोंयची हिंदू संस्कृती सांबाळून दवरपा खातीर छत्रपती शिवाजी महाराजांचे म्हत्वाचे योगदान आसा, हे आमकां सगळ्यांक खबर आसा. भारतीय म्हूण आमी ह्या पराक्रमी आनी म्हान देशभक्ताची जीण आनी कार्य जाणून घेवपाची गरज आसा.
फाटल्या अडीच दशकां सावन छत्रपती शिवाजी महाराज जयंती सुवाळो राज्य सरकारा वतीन राज्य पांवड्याचेर व्हडा दबाज्यान मनोवपात येता आनी ह्या वर्सुकी सुवाळ्याचो आंवाठ आनी उत्साह अनेक पटीन वाडिल्लो पळोवंक मेळटा.
फर्मागुडयेर जावपी मुखेल राज्य पांवड्या वयल्या सुवाळ्या खेरीज ह्या वर्सा राज्य सरकारान पर्यटन खात्या वतीन राज्यांतल्या मुखेल शारांनीय छत्रपती शिवाजी महाराज जयंती सुवाळो मनोवपाचो निर्णय घेतला. सरकारान छत्रपती शिवाजी महाराज जयंती सुवाळो मनोवपा खातीर पणजी, म्हापशें, मडगांव, मुरगांव, फोंडा आनी साखळी नगरपालिका मंडळांच्या समितींक दरेकी 5 लाखाचो निधी आदार दितले. दिवचले हांगाय 19 फेब्रुवारीक शिव जयंती सुवाळो दबाज्यान मनयतात. आयचो सुवाळो हो तांकां छत्रपती शिवाजी महाराजांक खरी आदरांजली आसा. सरकारा वतीन दर वर्सा आयोजीत जावपी ह्या सुवाळ्याच्या माध्यमांतल्यान खास करून युवा पिळगे मदीं छत्रपती शिवाजी महाराजांचें कार्य, तत्व आनी विचारांची रूजवण करपाक मजत जातली.
छत्रपती शिवाजी महाराजांच्या राज्याभिषेकाच्या 350 व्या वर्सां निमतान सरकारान कार्यक्रमांचें आयोजन केल्लें. पुरातत्व आनी पुराभिलेख खात्यान बेतूल किल्ल्याचेर कार्यक्रमाचे आयोजन केलें. तशेंच पर्यटन खात्यान शिव शौर्य मिरवणुकीचें आयोजन केलें.
छत्रपती शिवाजी महाराजान हिंदवी स्वराज्याची स्थापना करून रयतेच्या हिताच्या दृश्टीन राज्यकारभार चलयलो. ते एक पराक्रमी योद्धा आशिल्लेच, तेच बरोबर ते एक कुशळ प्रशासक आनी आदर्श राजा आशिल्लें. तांची प्रशासकीय कुशळटाय, नियोजन, आदर्शवाद, राजनिती उचेंल्या तांकीची आशिल्ली. तांणी युध्द कुशळटाय, सैन्यबळ आनी राजनितीच्या बळाचेर अनेक म्हत्वांचे किल्ले आपल्या ताब्यात घेतले तशेंच नवीन किल्लेय बांदले. छत्रपती शिवाजी महाराजान आपल्या फकत 50 वर्सांचे जिणेत रयतेच्या मनात स्वराज्य आनी अभिमानाची भावना जागी केली. ते भारत देशाचे एक म्हान राष्ट्र पुरूष आसात. ते समस्त भारतीयां खातीर आदर्श आनी प्रेरणास्थान आसात.
आयज तांचे जयंतीच्या प्रसंगार आमी तांकां नमळायेची आर्गां ओंपुया आनी आमचे युवा पिळगेक आमच्या देशाचे आदर्श आनी जापसालदार नागरीक घडोवपा खातीर तांच्या मनात छत्रपती शिवाजी महाराजांची तत्वां, कार्य आनी मुल्यांची रूजवण करूया.

प्रकाश एस. नायक