भांगरभूंय | प्रतिनिधी
म्हापश्यां अपघाता उपरांत ब्रेन डेड जाल्ल्या गोविंद यादव (जबलपूर- मध्यप्रदेश) ह्या कामगाराचें अवयव दान करपाचो व्हडलो निर्णय ताच्या कुटुंबान घेतलो, ताची तोखणाय करपाक जाय. यादव हांचें काळीज, पुलमांव (फुफ्फुस), यकृत (लिव्हर) आनी दोनूय मुत्रपिंडां (किडणी) आतां पांच दुयेंतींक मेळटलीं. तांचो जीव वाटावलो. हातूंत दोन दुयेंती जीएमसींत, एक मुंबयं तर एकलो अहमदाबादाक उपचार घेता. पुलमांवाक दुयेंती मेळूंक ना. तें दिल्लींत सुरक्षीत दवरलां. अवयव व्हरपा खातीर खाशेली तजवीज केल्ली. रक्तदान हें सगल्यांत श्रेश्ठ दान म्हणटात, पूण हें अवयव दान ताचेकूय म्हान म्हणचें पडटलें. एकाच वेळार कितल्याश्याच दुयेंतींचो जीव वाटावला. जीएमसीन हे खातीर फुडाकार घेतलो. मरणा उपरांतूच लोकांनी याद काडपाक जाय, अशें कार्य मनशान करपाक जाय, अशें म्हणटात. म्हान कार्य करूंक नासलें तरी तो मरतकच बरो मनीस, अशी ताची याद लोकांनी काडपाक जाय. गोविंद यादवाचीय याद लोक काडटले. ताच्या अवयव दानान पांच लोक साल्वार जाल्यात. ताचे घरकान्नीक, कुटुंबाक सलाम!
अवयव दान म्हणल्यार मनशाचो बरो अवयव वा टिश्यू दुसऱ्याचो जीव वाटावपाक दान करप. मनीस जिवो आसतना तें करपाक शकता. खास करून किडणी. कारण, वैजकी शास्त्रा प्रमाण, मनशाक जगपाक एक किडणी पुरो. मेले उपरांतूय पुराय कूड वा अवयव दान करपाक शकतात. खंयच्याय हाॅस्पिटलांत वा दोतोरा कडेन हाची म्हायती मेळटा. अवयव दान करपाक पिराय लागना. 18 वर्सां सकयल्या भुरग्यांक मात ते खातीर पालकांची परवानगी घेवची पडटा. काळीज, किडणी, स्नायू, पुलमांवां, फिग्द, यकृत, दोळे (काळें बुब्बुळ), आतकड्यो, कात, नर्व्ह, हाडां….. अशे जायते अवयव दान करपाक मेळटात. ते योग्य आसात काय नात, तें जाणकार दोतोर थारायतात. अवयव दान करपी मनशाक मुक्ती मेळना, अशें कांय धर्मांनी मानतात. काळीज वा हेर खंयचोय अवयव काडप म्हणल्यार तो मनीस अर्दकुटो जालो. शास्त्रांत तें बसना, असोय समज थोड्या धर्मांनी आसा. अवयव जावं रक्त सगल्याच धर्मांच्या, पंथाच्या, जातीच्या, वंशाच्या मनशाक जाय पडटा. वैजकी शास्त्रा प्रमाण, अवयव दान करपी आनी तो घेवपी मनशाचो वंश एकूच आसल्यार अवयव प्रत्यारोपण यशस्वी जावपाची टक्केवारी चड आसता इतलेंच. अवयव दान केल्ल्या मनशाच्या कुटुंबाक कसलेंच अर्थीक वजें सोंसचे पडना. अवयव कोणाक दिल्यात वा ते कोणाचे ताची म्हायती विचारली जाल्यारूच कांय अटींचेर ती संबंदीत कुटुंबाकूच दितात. अर्थांत दिसाळ्यांनी खबरो येतकच अवयव दान घेवपी कुटुंबाक ताचो अदमास येवं येता.
शक्यतो सगल्यांनीच अवयव दान करपाक जाय. वैजकी म्हायती प्रमाण, भारतांत वर्साक 25 हजार दुयेंतींत यकृताची गरज पडटा. ल्हान भुरग्यांक पसून आतां यकृत जाय पडपाक लागलां. यकृताचो कुडको काडल्यार तें कांय दिसांनी परत आशिल्लें तशें जाता. हो वैज्ञानीक चमत्कार करपी मनशाचो हो एकमेव अवयव. दरवर्सा 50 हजारां वयर लोकांक काळजाचीं गंभीर दुयेंसां जातात. मात फक्त 10 ते 15 दुयेंतींचेंच हार्ट ट्रान्सप्लांट करचें पडटा. दोळो हो सगल्यांत म्हत्वाचो अवयव. 2023 मेरेन देशांत 10 लाखां वयर लोकांक बुब्बुळाची गरज आशिल्ली. दरवर्सा तातूंत 25 हजारांची भर पडटा. तांकां जर बुब्बुळां मेळत, म्हणल्यार मरणा उपरांत दोळे दान करपी लोकांचो आंकडो वाडत जाल्यार देशांतल्या दृश्टीहिनांची समस्या कांय वर्सां भितर सोंपतली. आमच्या देशांत वर्साक सादारण 30 ते 35 हजार लोकूच दोळे दान करतात. 2022 त भारतांत साडेचार लाख लोकांक अपघातांत मरण आयिल्लें. देशांत जायत्यो संस्था दोळे दाना विशीं जागृताय करतात, मात तरीय फावो तो प्रतिसाद मेळना, अशें तांचें मत. नाणीजच्या नरेंद्र महाराजाच्या जायत्या अनुयायांनी देहदानाचो उपक्रम चालीक लायला, ही आगळी वेगळी गजाल. हेरांनी तांचें अनुकरण करपाक जाय.
मरणा उपरांतूय आपलो मनीस जिवो उरप हाचे सारकें दुसरें भाग्य ना. अर्थांत तो अवयव रुपान जितो उरता. दुयेंतीच्या, ताच्या कुटुंबाच्या उपकारांत तो कायमचो उरता. अवयव मेळूंक नाशिल्ल्यान हजारांनी भारतीय दुख्ख, कश्टाची जीण जगतात. देखून चडांत चड लोकांनी ह्या म्हान दाना खातीर मुखार सरपाक जाय. समाजसेवी संस्थांनी हाची जागृताय करूंक जाय. अवयव दान केल्यार ती देशाची, मनीसकुळयेची सेवा थारतली. दुबावूच ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.