भांगरभूंय | प्रतिनिधी
म्हादयचें उदक कर्नाटक कशें व्हरतां, ताचें मूळ सोदून काडपा पासत सभाघर समितीचो वावर मार्गाक लागला. वरिश्ठ, अणभवी राजकारणी शिपणेंमंत्री सुभाष शिरोडकार कर्नाटकाचे मुख्यमंत्री बसवराज बोम्माई हांचे सयत म्हादयच्या कर्नाटक, गोंयच्या वाठाराची पळोवणी करतले, अशी आस्त आसा. ते खातीर सभाघर समितीच्या हेर वांगड्यांनी श्री. शिरोडकार हांच्या फाटल्यान लागपाक जाय. समितीच्या वांगड्यां सयत ते म्हादयच्या वाठारांत भोंवल्यार एकादरे तांकां म्हादयचीं विंगड विंगड रुपां दिसतलीं. म्हादयचें उदक खंय झिरपता, कितलें खंयच्या राज्यांत आसा, लोकवस्ती कितली, कोणाची ती जाणवीकाय जातली. वाठारांतले लोकसंस्कृतायेची वळख जातकीच म्हादय लोकसंस्कृतायेंतल्यान कितली व्हांवता, धांवता तो अदमास येतलो. म्हादयचे कुडके कित्याक करप? वगीच झुजप कित्याक ? हीं गणितां सोडोवपाक म्हादय परिक्रमा मार्ग दाखयतली. एकादरे साष्टींतले साळ न्हंयेचे नितळसाणीची वाट तेच परिक्रमेंत लिपिल्ली आसतली.
गोंयचो फुडार, राजकारण म्हादयचेर निंबून आसाच, कर्नाटक वेंचणुकेचेरय ताचे परिणाम जावचे नात, अशें न्हय. कर्नाटकाची वेंचणूक लागीं येता तेन्ना म्हादयचो विषय उस्तून काडपाचे येत्न हाचे आदींय जाल्यात. बांद, धरणां बांदपाचें उतर राजकारणी दितात, पूण जिखून येतकीच ताचे कडेन फाट करतात तेन्ना लोकच आपले गरजे खातीर वेगळी वेवस्थाय करतात. गोंयचे सभाघर समितीन म्हादय परिक्रमेत कर्नाटकाच्या मुख्यमंत्र्यांक सत सांगपाक जाय, कर्नाटकांत पियेवपाच्या उदकाची वेवस्था कशी आसा ताची म्हायती मेळोवपाक जाय. गोंय कर्नाटकाचें नातें महाराष्ट्रा परस व्हड आसा तें कोंकणी भाषा, मनीस, देवळां म्हाजन, वेपार – वेवसाय संस्कृतायेक लागून. कर्नाटकांत गोंयकार व्हडा संख्येन आसात, मूळ विसर नासतना कानडी कडेन, थंयचे संस्कृताये कडेन ते भरसून गेल्यात. कर्नाटकाच्या मुख्यमंत्र्यांक ती म्हायती आसा अशें कर्नाटक म्हादयच्या उदका पासत जे आक्रमकतेन फुडें वता तें पळेल्यार दिसता. गोंय इल्लेशें, ताका कित्याक भिवप, गोंय आमचेंच, गरजेक आमचे वांगडा रावतलेंच अशें तांकां दिसता व्हय? कर्नाटक म्हादयच्या उदका खातीर मोन्यांनी जे तरेन पावल मारता तें निमण्या पर्वा खातीर? कर्नाटकाच्या मुख्यमंत्र्यांक मेळ्ळ्यार कांय प्रश्नाच्यो जापो मेळटल्योच आनी त्यो सोदपाचो येत्न सभाघर समितीन करचो.
म्हादयचें उदक तापता आसतनाच मिनाची येरादारी मांडवीतल्यान नेटान जाता. कर्नाटकांतलें मीन गोंयच्या मिनांत भरसल्ले बगर मिनाची निर्गत कशी जायत? म्हादय वाठांरातल्यो दोंगुल्ल्यो, वझरे, तळीं सांबाळपाचो वावर कर्नाटक, गोंय सरकारान करपाक फुडारांत करपाक जाय. कर्नाटक, गोंय सरकारा मदीं तेविशीं कबलाती जावच्यो, संवसारभर शिंपडिल्ले उद्येजक, कोंकणी मोगी ते पासत अर्थिक आदार दिवंक शकतात.
कर्नाटक, गोंय, महाराष्ट्र हीं भारतांतलीं म्हत्त्वाचीं राज्यां. तंटे आसले तरी शीम पयस करून एकामेकांक आदाराक पावतात, केन्ना केन्ना झगडटातय. म्हादयच्या प्रश्नाचेर तीनय राज्यांनी शिमो, म्हेरो पयसावन एकठांय आयल्यार उदरगतीचे नवे झरे व्हांवत व्हय? देसांतलीं गिरेस्त राज्यां जावपाची तांक ह्या राज्यां भितर आसा, ताचें कुवाडें राज्यांतल्या मिनाच्या खणींनी लिपिल्लें आसा. तिखें, वज्रां, भांगर तशेंच हेर म्हत्त्वाच्यो खणी ह्याच तीन राज्यांनी आसात. अस्तंत घांटांतलीं हीं राज्यां म्हळ्ळ्यार सैमाची, वखदी वनस्पतीचीय खण. साहित्य, शिक्षण, भेस, लोकसंस्कृताय, उद्येग, वेवसाय, वेपारांत देस उंचेल्या पावंड्यावर व्हरपाक ह्या राज्यांनी आयजवेर मोलादिक वावर केला. म्हादयच्या उदका विशीं तीनय राज्यांनी एकामेकांचे बरें वायट चितून निर्णय घेतल्यार लाव फुडले पिळगेक मेळटलो.
म्हादयच्या उदकाचो प्रश्न कर्नाटक, गोंय, महाराष्ट्रा पुरतो उरूंक ना तो सर्वोच्च न्यायालयांत पावला, संवसारय जागो जाला. संवसारांत बुडटी येतली, उदका पासत तिसरें झुज जातलें अशें भविष्य केल्लें आसा. अशे परिस्थितींत म्हादयच्या झुजांत तीनय राज्यांनी एकामेकांच्या सांगातान वावराची दिका ठरयल्यार सर्वोच्च न्यायालयाक न्याय दिवप सोपें जातलें. सभाघर समितीच्या सगल्या वांगड्यांनी ते खातीर राजकारण, राजकी पक्ष कुशीक दवरून वावुरचें. कर्नाटकाच्या मुख्यमंत्र्यांक मेळचे आदीं सभाघर समितीन महाराष्ट्राचे मुख्यमंत्री, उप मुख्यमंत्री, विरोधी पक्ष मुखेल्यांक मेळप बरें. मुखेलमंत्री डाॅ. प्रमोद सावंत, आदले मुखेलमंत्री, उपमुख्यमंत्री हांचे लागींय समितीच्या वांगड्यांनी भासाभास करची. पयलींच्या सभाघर आनी अदमासपत्र वा लोक लेखा समितीच्या वावरांतल्यान दोंगर पोखरून हुनीरय भायर सरल्यात हाचो विचार केल्यार म्हादय सभाघर समिती देख दिवपी म्हणून यादींत उरतली.
विधानसभेचे नवे वांगडी सभाघर समितींत आसात, ताणीं समित्यांचो वावर कसो आसता तें शिकचें पडटलें. म्हादय आमचीच न्हय कर्नाटक, महाराष्ट्राचीय आवय, शिमेच्या वाठारांक जोडपी एक म्हत्त्वाची न्हंय हें पर्यावरणमोगी, म्हादय संस्कृतायेचे अभ्यासक राजेंद्र केरकार सांगतात. ते वागां खातीर वेगळो काॅरीडाॅर कित्याक मागतात? आदले राज्यपाल जे एफ आर जेकब हाणीं दाखयल्ल्या मार्गान वचपाचो तांचो आग्रो कित्याक? सभाघर समितीच्या सगल्या वांगड्यांनी तांकां प्रेझेंटेशनाची संद दिवची, तांकां प्रश्नय विचारचे. म्हादय, कर्नाटकाच्या मुखेलमंत्र्यांकय गोंयचो म्हादय वाठारांतल्यान भोंवपाचो उलो मारचो.
म्हादय आयज भुरग्यां मेरेन पावल्या, सैमशास्त्राचो विशय शिक्षणाच्या मुळाव्या पावंड्यार भुरग्यां मेरेन पावोवपाचें व्हड आव्हान गोंय सरकारा मुखार आसा. फकत म्हादयच न्हय, तर मांडवी, झुवारी, कुशावती, तेरेखोल, साळ, मंदाकिनी, अघनाशिनी, तार म्हापशें तशेंच हेर न्हंयो, तळ्यांची वळख त्या शास्त्रांतल्यान मुळाव्या शिक्षणात जावची. माध्यमिक, उच्च माध्यमिक पावंड्यार आय टी आय ते आय आय टी मेरेन तंत्रगिन्यान ते सैमशास्त्र शिकयतात. सैमशास्त्रांत इतिहास, भुगोलाकय ल्हानशी सुवात मेळपाक जाय. शिक्षणातलें सैमशास्त्र कशें आसा तें मुख्यमंत्र्यांनी समजून घेतल्यार स्वयंपूर्ण २ चें नवें नियोजन शारां मेरेन वतलें.
महाराष्ट्र, कर्नाटक ही दोनय राज्यां भुंयेन व्हडलीं, गोंय ल्हान पूण दोनय राज्यांतल्या लोकांक भावता हाजोच अर्थ फकत शांतीकायच न्हय जाल्यार अर्थकारणात, शिक्षणातय ह्या राज्याचें खाशेलेपण आसा. म्हादय बचाव अभियानाची पण्टी, मेणवात सदांच पेटत उरप त्या खाशेलेपणाची कुरु आसा. सभाघर समितीच्या वावरांत म्हादय बचाव अभियानाचो वांटो आसतलोच, पूण संवसारांतलें सैममोगी समिती वाटेन येतले. कोकण रेल्वे आंदोलनांतल्यानय रगत व्हांवलें, पूण निमाणे कोकण रेल्वे मात्शी कूस परतून आयलीच, मनोहर मोपा विमानतळाचेंय तेंच. म्हादयतल्यान गोंयकारांक 24 वरां पियेवपाचें नितळ उदक दिवपाचें सरकाराचें सपन पुराय जावपाचो वगत आयला. अर्थसंकल्पात निश्चेव करून फुडलीं तीन वर्सांची मोख गोंयच्या डीपीआरांत दवरची, सभाघर समिती ते खातीर मार्गदर्शक जावची.
सुहासिनी प्रभुगावकर
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
