भांगरभूंय | प्रतिनिधी
वाळपयः भिंरोंडें पंचायतींतल्या म्हादय वाठारांत 24 मार्चाक दनपारां अचकीत उजो लागलो. ह्या उज्यांत रानांतल्या झाडांचें आनी काजू बागायतींचें लुकसाण जालें. दोन दिसां आदीं अडवय वाठारांत उजो लागून काजींचें व्हड प्रमाणांत लुकसाण जाल्लें.
दोन दिसांनीच परतून एकदां उजो लागून रान संपत्ती आनी काजी बागायतींचें लुकसाण जाल्ले खातीर लोकां मदीं खर तिडक आसा. गांवचे सरपंच उदयसिंग राणे हांणी लेगीत नाराजी उक्तायल्या. जर कोणेतरी मुद्दाम हो उजो लायिल्लो आसात जाल्यार खऱ्यांनीच ही दुर्दैवाची गजाल, अशी तांणी प्रतिक्रिया दिली.
उजो लागिल्ल्याची म्हायती मेळटाच थळाव्या लोकांनी थंय धांव मरून उजो पालोवपाचो यत्न केलो. मात दनपारचो कड आनी नेटाच्या वाऱ्याक लागून उजो नेटान पातळटालो. ताका लागून ताकतिकेन वाळपय उजो पालोवपी दळा कडेन संपर्क केलो. दळाच्या जवानांनी ताकतिकेन येवन उजो पालोवपाच्या कामाक सुरवात केली. उजो पालोवपाक तांकां सुमार दोन वरां लागलीं. मजगतीं, उजो पालोवपी दळान पुराय उजो पालयलां. हे संबंदांतलो पंचनामो केले उपरांत लुकसाणेचो आंकडो स्पश्ट जातलो. ही प्रक्रिया रोखडीच हातांत घेतले, अशें उजो पालोवपी दळाच्या सुत्रांनी सांगलें.
उजो लायता असो दुबावः उजो पालोवपी दळ
ह्या उज्यान रान संपत्ती आनी काजू बागायतींचें लुकसाण जालां. दोन दिसां आदींच ह्या वाठारांत लागिल्ल्या उज्यांत खूब जाणांच्यो काजू बागायती लाशिल्ल्यो. तातूंत शेतकारांचें व्हड प्रमाणांत लुकसाण जाल्लें. दोन दिसां उपरांत परतून ह्याच वाठारांत उजो लागप हें खऱ्यांनीच दुर्दैवी आसा. अज्ञात मनीस हो उजो लायता आसपाक जाय, असो दुबाव उजो पालोवपी दळान उक्तायला. असोच दुबाव सरपंच उदयसिंग राणे हांणी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
