भांगरभूंय | प्रतिनिधी
सागर मुळवीः लोकसभा जिखपा खातीर नश्टे आरोप
भांगरभूंय । प्रतिनिधी
फोंडें: भाजपा सरकार सगळ्याच मळाचेर उदरगत करता. हेच खातीर काँग्रेस फुडारी म्हादय मुद्द्याचेर सरकाराचेर आरोप करतात. गोंयकारांची दिशाभूल करून येता ती लोकसभा वेंचणूक जिखपाचो तांचो यत्न आसा. म्हादय प्रस्न सोडोवपा खातीर सरकार बांदील आसा. काँग्रेस फुडाऱ्यांनी आतां मेरेन फक्त म्हादय प्रस्नाचेर फटवणूक केल्या, असो आरोप मडकय भाजपा मंडळान केला.
फोड्यां बुधवारा घेतिल्ले पत्रकार परिशदेंत मडकय भाजपा मंडळाचे उपाध्यक्ष सागर मुळवी, उपाध्यक्ष दिनेश वळवयकार, सचीव जयराज नायक आनी सुभाष गावडे हाजीर आशिल्ले.
सागर मुळवी हांणी सांगलें, म्हादय संबंदांत उपाय काडचे खातीर भाजपा सरकाराचे यत्न चालू आसात. पूण फाटले खेपे खणीच्या प्रस्नाचेर दक्षीण गोंय मतदारसंघांत जैत मेळयिल्ल्या काँग्रेसीन सध्या म्हादय संबंदांत लोकांची दिशाभूल केल्या. येता ती लोकसभा वेंचणूक नजरे मुखार दवरून लोकां मदीं सरकारा विशीं भंय निर्माण करपाचो यत्न लेगीत काँग्रेसीन केला. लोकांनी काँग्रेसीच्या बंडलांक बळी पडचे न्हय, असो तांणी उलो मारलो. केंद्रांत आनी राज्यांत भाजपा सरकार विवीध उदरगतीचीं कामां नेटान करता. ते खातीर काँग्रेसी कडेन हेर मुद्देच नाशिल्ल्यान म्हादय प्रस्नाचो लाव घेवपाचो यत्न चलयला. म्हादयचो प्रस्न निश्चीत भाजपा सरकार सोडयतलें. राज्यांतल्यो खूबश्या पंचायतींच्या ग्रामसभांनी म्हादय संबंदांत थाराव मंजूर करून सरकाराक धाडल्यात. ह्या थारावांची सरकार निश्चीत दखल घेतलें, अशें सागर मुळवी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
