भांगरभूंय | प्रतिनिधी
पणजी: गोंयांत म्हादय न्हंय आनी वाडपी स्थलांतरीत लोकसंख्येच्या राजकारणावेल्यान ’रिव्होल्युशनरी गोवन्स’चे मुखेली मनोज परब आनी कन्नड साहित्य परिशदेचे अध्यक्ष सिद्धाण्णा मेटी हे दोगूय बरेच एकामेकांचेर शब्दीक वार करपाक लागल्यात. मेटी यांनी परब हांचेर गरिबांच्या नांवार राजकारण करपाचो आनी समाजांत फूट घालपाचो यत्न सुरू आशिल्ल्याचो आरोप केलो. जाल्यार परब हांणी ’घाटी’ शब्दाचो वापर गुन्यांवकारां खातीर जाता अशें स्पश्ट केलें.
सिद्धाण्णा मेटी हांणी परब हांचे टिकेक जाप दितना म्हादय प्रस्नाचेर सरळ आव्हान दिलें. मेटी हांणी म्हणलें, म्हादय न्हंय गोंयां खातीर म्हत्वाची. जर मनोज परब हांणी फुडाकार घेवन कर्नाटक शिमेर वचून, म्हादय विशीं खर भुमिका घेतल्यार हांव सगल्या कन्नड नागरिकां सयत ह्या ताच्या लढ्यांत तांचे वांगडा येवपाक तयार आसा.
मेटी हांणी परब हांकां अपाले वांगडा दिल्लींत केंद्रा वांगडा चर्चा करपाची तयारी दाखोवची अशें आवाहन केलां.तांणी मुखार म्हणलेंे, ह्या राजकारणी लोकांक फकते वेंचणुके वेळारूच म्हादयचो उगडास येता. तांणी परब हांचेर थळाव्यांक फकत मतां खातीर लक्ष्य करता आनी ब्रिटिश राजवटी प्रमाण फूट घालून राज्य करता असो आोपूय केलो.
ह्यान पयलीं मनोज परब हांणी पत्रकार परिशद घेवन सिद्धाण्णा मेटी हांकां म्हादय न्हंये विशीं तांची भुमिका स्पश्ट करपाची मागणी केल्ली. ते स्वताक गोंयकार मानता आसत जाल्यार तांणी म्हादयच्या विशयाचेर कर्नाटक सरकाराक जाप विचारची, अशें परब हांणी म्हणिल्लें.
आरजीचे आमदार वीरेश बोरकार हांणीय भाजपाचेर टिका करतना, फुडाराक बिगर गोंयकारांक लागून गोंयचे अस्मितेक व्हड धोको आशिल्ल्याचें तांणी सांगलें. फुडल्या ५ ते १० वर्सांनी गोंयच्या ४० आमदारां मदले खुबशे आमदार बिगर गोंयकार आसतले. राज्यांतल्या कांय आमदारांनी वोटबँक तयार करपा खातीर बिगर गोंयकारांच्यो वस्त्यो निर्माण केल्यो. आयज हेच लोक पंच, सरपंच जाल्यात आनी बेगीनूच ते आमदार जावपाची शक्यताय न्हयकारूं येना, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
