भांगरभूंय | प्रतिनिधी
-घाळपणां सोडून विशय प्राधान्यान घेवचो, विधीकार दिसा वेळार मागणीपणजीः म्हादय विशया वयल्यान आदल्या आमदारांनी सरकाराचेर फोग काडलो. सरकाराच्या घाळपणाक लागून म्हादयचें उदक अजूनय रखडटा. ते भायर सरकारान खर अशी भुमिका म्हादय विशयाचेर घेवंक ना. आयज भारत म्हादय राखपाक शकना जाल्यार फाल्यां ब्रम्हपुत्रा न्हंय वगडावन बसतले, अशी खर टिका आदल्या आमदारांनी केल्या.
पर्वरे विधानसभा संकुलांत गोंय विधीकार दीस व्हड उमेदीन मनयलो. ह्या वेळार उक्त्या माचयेचें आयोजन जाले. ह्या उक्त्या माचयेर आदल्या आमदारांनी आपल्यो सुचोवण्यो सराकारा मुखार मांडून ताची अंमलबजावणी करपाची मागणी केली. सुचोवण्यो मांडटना आदले आमदारांनी म्हादयचो विशय लावन धरलो.
राज्य सरकार आनी केंद्र सरकाराच्या घाळपणाक लागून म्हादयचो विशय अजून प्रलंबीत आसा, असो आरोप आदले आमदार शंभू भाऊ बांदेकार हांणी केलो.
मुख्यमंत्री डॉ. प्रमोद सावंत हांकां विनवणी करून आमी कणकुंबी मेरेन गेल्ले. थंय सत्य स्थिती आनी कर्नाटकान केल्ल्या कामाचें तथ्य कितें आसा ते दोळ्यांनी पळोवन सरकाराक हे विशीं कळयिल्ले. पूण दुर्देवाची गजाल म्हळ्यार सरकारान आडनदर केल्ल्यान म्हादय विशय अजूनय प्रलंबीत आसा. म्हादयचो विशय प्राधान्यान घेवचो आनी सगळ्यांक न्याय दिवचो, अशी मागणी बांदेकार हांणी केल्या.
म्हादय विशयाचेर गोंय सरकारान कर्नाटका आड गंभीर आक्षेप घेतल्या आनी ते आक्षेप सरळ भायरायल्यात अशें दिसून येता. पूण पळोवपाक गेल्यार उदक घुंवडावपाचो विशय गोंयाक पिडटना दिश्टी पडटा, अशे आदले आमदार राधाराव ग्रासियस हांणी सांगलें.
आयजच्या घडयेक चीनान टिबेट वाठारांत थ्री गोर्जीस डॅमा परस व्हडलें धरण बांदपाक सुरवात केल्या. हे धरण साेंपो न्हंयेंचे उदक म्हळ्यार भारतांतल्या ब्रम्हपुत्रांत घुंवडायतले म्हण्टांत. कर्नाटका आड घेतिल्ले राज्य सरकाराचे जे आक्षेप भायरायल्यात, तेच भशेनचे आक्षेप भारतान चीना आड उक्तायल्यात. जर आक्षेपाचीं कारणां भायरावपाक शकतात जाल्यार चीन सरकार हीच कारणां भायरायतलोच. आयज आमी म्हादय शेणटली, फाल्यां ब्रम्हपुत्राय वगडावन बसतले, अशी खंत राधाराव हांणी उक्तायली.
म्हादयचे बाबतींत सरकार उलयता एक, करता दुसरेच, असो थोमणो आदली आमदार आनी म्हादय बचाव आंदोलनाची निर्मला सावंत हाणी मारलो.
आमच्या सारकिल्ल्यानी कणकुंबींत थळार वचप म्हळ्यार एक भयानक प्रकार. देखून हावस कमिटीक कणकुंबीक धाडून पळोवणी करपाक लावचे. म्हादयचें उदक मलप्रभेंत पाविल्ले आसा आनी उरला ते वच्चे न्हय म्हण यत्न करचे. राज्य आनी केंद्रीय उदक आयोगाचें मत कुशीक दवरून कर्नाटकाच्या मतांक हयकार मेळटा. हाचो अर्थ सरकार भिवकुटो आनी कणो नाशिल्ल्या सारको वागता काय, असो प्रस्न सावंत हिणें उप्रासलो.
आमी जेन्ना अभ्यास करपाक साट्रे गांवांत गेली तेन्ना म्हादय गेली म्हण काय जावपाचें ना. आमकां ओलसाण आसल्यार पुरो, अशीं उतरां गांवकाऱ्यांनी म्हणलीं. पूण आमी तांकां समजावन सांगलें, म्हादय ना जाल्यार ओलसाण कशी येतली आनी बागायती शेतां जगतली कशी. हाचो अर्थ तांची दिशाभूल करपाचो यत्न चल्ला आनी हे यत्न बंद जावचे, अशे सावंत हांणी मागला.
——————
टायगर जिंदा है, सरकार सोया हैः युरी
म्हादय विशयाचेर एक इंच लेगीत प्रगती आमकां दिसून येवंक ना. जाल्यार दुसरे वटेन ह्या विशया वयल्यान तणाव आनी धोक्यांत वाड जाल्या. कणकुंबी वाग दिसून आयलो, पूण जेन्ना म्हादय अभायारण्य वाग क्षेत्र घोशीत करपाचो प्रश्न येता तेन्ना ‘टायगर जिंदा है आनी सरकार सोया है’ आमकां दिसून येता. म्हादय रानांत वागांचें अस्तित्व आसा अशें राष्ट्रीय वाग संरक्षक प्राधिकरणाच्या अहवालांतल्यान दिसून आयलां, अशें विरोधी पक्ष फुडारी युरी आलेमांव हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
