म्हादय लवाद, ब्रॉडबँड नेटवर्क ही मनमोहन सिंग हांची गोंयाक भेट

भांगरभूंय | प्रतिनिधी

प्रदेश काँग्रेसीन ओंपलीं आदल्या प्रधानमंत्र्यांक आर्गां

भांगरभूंय । प्रतिनिधी

पणजी : म्हादयचो प्रस्न सुटावो जावपा खातीर लवाद स्थापनेचो निर्णय आनी ब्रॉडबँड नेटवर्क सेवा ही आदले प्रधानमंत्री डॉ. मनमोहन सिंग हांची गोंया खातीर भेट आसा. डॉ. मनमोहन सिंग हांचो गोंया सयत देशाचे उदरगतींत मोलाचो वांटो आसा, अश्या उतरांनी काँग्रेस फुडाऱ्यांनी आदले प्रधानमंत्री डॉ. मनमोहन सिंग हांकां आर्गां ओंपलीं.

आदले प्रधानमंत्री डॉ. मनमोहन सिंग हे 26 डिसेंबराक राती संवसाराक अंतरले. तांकां आर्गां ओंपपा खातीर प्रदेश काँग्रेसी वतीन आयतारा मिनेझीस ब्रागांझा सभाघरांत बसका जाली. काँग्रेस विधीमंडळ फुडारी युरी आलेमांव, आमदार कार्लोस फरेरा, आदले खासदार फ्रान्सीस सार्दीन, आदले केंद्रीय मंत्री अॅड. रमाकांत खलप, प्रदेश काँग्रेस अध्यक्ष अमीत पाटकार, अमरनाथ पणजीकार, आदले आमदार व्हिक्टर गोन्साल्वीस आनी हेरांचीं उलोवपां जालीं. एक मिनीट शांतताय पाळून काँग्रेसीचे पदाधिकारी आनी कार्यकर्त्यांनी डॉ. मनमोहन सिंग हांकां आर्गां ओंपलीं. आर्गां ओंपपी थाराव संमत जालो. तांच्या फोटवाक फुलांचे झेले घालून तांकां आर्गां ओंपलीं.

डॉ. मनमोहन सिंग हे नामनेचे अर्थशास्त्री आशिल्ले. रिझर्व्ह बँकेचे गव्हर्नर, अर्थ सचीव आनी देशाचे अर्थमंत्री ह्या नात्यान तांणी देशाचे अर्थवेवस्थेक उबारी दिली. देशाचे अर्थवेवस्थेक आदार दिवन ती वाडोपाक डॉ. सिंग हांचें व्हड योगदान आसा. देशाचे प्रधानमंत्री आसतना अन्न सुरक्षा कायदो, शिक्षण हक्क कायदो अशें कल्याणकारी कायदे तांणी हाडले. हाचो गोंया सयत हेर सगळ्या राज्यांक लाव जालो. लोकशायेचो चवथो खांबो आशिल्ल्या प्रसारमाध्यम स्वातंत्र्याचो तांणी सेगीत आदर केलो, अशें युरी आलेमांव हांणी सांगलें.

एनपीए वाडलो जाल्यार लेगीत बँक कशी सुरक्षीत उरतली, हाचो मार्ग डॉ. सिंग हांणी दाखयलो. राष्ट्रीयकृत बँकांचो पयसो सुरक्षीत उरपा सयत बँको बुडपाक जायना, म्हूण तांणी अर्थीक तजवीज केली, अशें आदले केंद्रीय मंत्री अॅड. रमाकांत खलप हांणी सांगलें. आपूण कायदोमंत्री आसतना लेगीत ताचें मार्गदर्शन मोलादीक थारलें, अशें तांणी सांगलें.

डॉ. सिंग हे प्रधानमंत्री आसतना आपूण खासदार आशिल्लो. हाका लागून तांचो वावर लागीच्यान पळोपाची संद मेळ्ळी. भाजप सरकार ज्यो कल्याणकारी येवजण्यो राबयता त्यो डॉ. सिंग हांच्या सरकारा वेळार सुरू जाल्ल्यो. ओल्ड वायन इन न्यू बॉटल, अशी ह्या कल्याणकारी येवजण्यांची स्थिती आसा, अशें सार्दीन हांणी म्हणलें.

देशाची अर्थवेवस्था सांबाळपी डॉ. सिंग हे अर्थतज्ञ म्हूण विद्वान आशिल्ले, अशें आमदार अॅड. कार्लोस फरेरा हांणी सांगलें. ते एकदाच लोकसभा वेंचणुकेक उबे राविल्ले आनी ते वेंचणूक हारले. हे विशीं तांकां विचारलें तेन्ना वेंचणूक लडोवपाक आमी योग्य ना, अशी जाप तांणी दिल्ल्याची याद अॅड. फरेरा हांणी सांगली.

प्रदेश काँग्रेस अध्यक्ष अमीत पाटकार हांणी अर्थवेवस्थे खातीर तांणी दिल्ल्या योगदानाचा उल्लेख भाशणांत केलो. एम. के. शेख हांणी येवकार दिलो जाल्यार एवसर्न कार्लोस हांणी उपकार मानले.