भांगरभूंय | प्रतिनिधी
मांडवी न्हंयेदेगेर तेंको दिवपाक हजारांनी ‘राखणदार’ हाजीर
भांगरभूंय । खबरां मेज
पणजीः शेनवारा 20 मेक पणजे ‘म्हादय आमची आवय’ निमतान मांडवी न्हंयेदेगेर म्हादय घुंवडावपाच्या मुद्द्याचेर लक्ष ओडचे खातीर हजारांनी लोकांनी हाजेरी लायली. आयोजकांनी दिल्ले म्हायती प्रमाण हजारांचे संख्येन हाजीर राविल्ल्यांची ‘राखणदार’ म्हूण नोंद केल्या. 7 किलो मिटर लांबायेची ही मानवी सांखळ सांता मोनिका जेटी ते मिरामार दर्यादेगे मेरेन आशिल्ली.
हे सांखळेन पुराय गोंयांतल्या लोकांक एकठांय येवपाची आनी म्हादयचें चरित्र तशेंच इतिहास समजून घेवपाची बरी संद दिल्या. अर्थविस्ट कलेक्टिव्ह, गोवा हेरिटेड एक्शन ग्रूप आनी सेव्ह म्हादय सेव्ह गोवा ह्या संस्थांनी एकठांय येवन हो उपक्रम आयोजीत केल्लो, अशें हेता पंडीत हांणी सांगलें.
‘म्हादय आमची आवय’ मानवी सांखळीचो केंद्रबिंदू आशिल्लो. ही कार्यावळ भारताचे दर्या परंपरेचो एक भाग आसा, जाचे खातीर सामान्य लोक, कलाकार आनी समाज एकठांय आयल्यात. ही एक बरी गजाल. आमचे कडेन खूबश्यो परंपरा आनी परबो आसात. तातूंत आमी न्हंयो, रानां आनी सैमाच्या हेर घटकांची पुजा तशेंच आदर करतात. हो भारतीय तत्वज्ञानाचो एक भाग आसा, अशें रिचर्ड डायस हांणी सांगलें.
कार्यावळींत थळावे लोक, कार्यकत्रे तशेंच विवीध नागरी संस्थांचे प्रतिनिधींचो आस्पाव आशिल्लो. ते मानवी सांखळ तयार करचे खातीर आनी म्हादय न्हंयेच्या संरक्षणा खातीर तांचे वचनबद्धतेचे प्रतीक म्हूण कार्यावळीचे सुवातेचेर जमिल्ले. न्हंय, जमीन आनी थळावे लोक हांचे मदीं आंतरीक आनी घट संबंद ठळक करपाचो ह्या महोत्सवाचो उद्देश आशिल्लो. वांटो घेतिल्ल्यांनी न्हंयांचे छटांचें प्रतिनिधित्व करपी निळ्या आनी धव्या रंगाचे कपडे घातिल्ले.
गोवा फॉरवर्डाचे अध्यक्ष विजय सरदेसाय, आम आदमी पक्षाचे कार्यकर्ते, काँग्रेस ह्या राजकी पक्षांनीय ह्या उपक्रमांत वांटो घेतिल्लो.
गोंयांतल्या फुडाऱ्यांक आनी भाजपा सरकाराक आतां तरी म्हादयचें गांभिर्य करचें. गोंयकारांक अजून जाग येना, ताका लागून म्हादय गोंयकारांच्या हातांतल्यान गेल्ल्यांत जमा आसा. अशे पद्दतीन लोक जागरूक रावून भायर सरले जाल्यर सरकाराक म्हादय घुंवडावप शक्य जावचें ना, अशें विजय सरदेसाय हांणी सांगलें.
विरोधी पक्ष फुडारी युरी आलेमांव, आमदार एल्टॉन डिकॉस्टा, आमदार कार्लूस फरेरा आनी हेर काँग्रेस फुडाऱ्यांनी हे मानवी सांखळेक हाजेरी लायली.
प्रदेश काँग्रेस केन्नाच म्हादय संबंदांत तडजोड करचो ना. आयज आपूण विरोधी पक्ष फुडारी म्हूण न्हय जाल्यार एक सामान्य मनीस म्हूण हे मानवी सांखळींत वांटो घेतला. गोंयांतल्या भाजपा सरकाराक म्हादय विशीं आतां तरी लोकांची जनजागृती पलोवन जाग येवपाक जाय. कर्नाटकां जरी काँग्रेस सरकार सत्तेर आयलां तरीय म्हादय तांकां घुंवडावपाक दिवचे नात, अशी प्रतिक्रिया युरी आलेमांव हांणी सांगलें.
शेनवारा जाल्ले हे चळवळींत नामनेचे डॉ. ऑस्कर रिबेलो, फा. बोलमॅक्स परेरा, गायिका हेमा सरदेसाय, समाज वावुरपी पॅट्रिशिया पिंटो, रंगकर्मी डॉ. इजाबेल वाझ, कार्यकर्ते क्लॉड आल्वारीस, वकील नॉर्मा अल्वारीस, पर्यावरण तज्ञ राजेंद्र केरकार, कवियित्री आनी निबंधकार प्रज्ञा चतुर्वेदी, प्रा. राजेंद्र केरकार हांणी वांटो घेवन ह्या मुद्द्याचेर आपले विचार मांडिल्ले.
मानवी सांखळी भायर ह्या उत्सवांत संगीतकार, नाच कलाकार, सर्जनशील कथाकार आनी न्हंयेदेगेर रावपी कलाकारांचें सादरीकरण लेगीत जालें. चित्रां, कविता, गितां, प्रतिश्ठापना, सादरीकरणां आनी रेंवेच्या रेखाचित्रांच्या स्वरुपांत तांणी न्हंयेचो सांबाळ करपाचें म्हत्व सांगपी कलात्मक अभिव्यक्ती सादर केली.
एक्ट फॉर गोवा, अर्बन स्केचर्स गोवा, प्लांटवॉक गोवा, गोवा बर्ड कॉन्झर्व्हेशन नेटवर्क, दॅट बूक स्टोर आनी ए एनएचओआय प्रकल्प/ बुकवर्म हांचे सयत विवीध गटांचो उत्सवाक उपाट तेंको मेळ्ळो.
खझान सोसायटीची अध्यक्ष तशेंच पर्यावरण वास्तूविशारद एल्सा फर्नांडीस हांणी लेगीत शेतकारांक ह्या महोत्सवांत वांटेकार करचे खातीर एकठांय केले. तशेंच म्हादय न्हंयेचो सांबाळ करचे खातीर सामुहीक जापसालदारकी आसा, अशें सांगलें.
म्हादय कडलें नातें अणभवलें: मिरियम कोशी
‘म्हादय आमची आवय’ हे कार्यावळीन कलाकार, संगीतकार, जॅझ बँड, ब्रास बँड, कलाकार, नाचपी कलाकार, रंगकर्मी आनी भुरग्यांक एकठांय काडून तांकां न्हंये विशीं कितें दिसता तें तांकां तांचे कले वरवीं मांडपाक सांगलें. तशेंच तांणी सादर केल्ले कलेंतल्यान आपल्याक तांचो न्हंये कडलें नातें लेगीत अणभवपाक मेळ्ळें, अशें अर्थविस्ट संस्थापक मिरियम कोशी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
