म्हादय याचिका सेगीत दुसरे खेपे सुनावणेक आयलीच ना

भांगरभूंय | प्रतिनिधी

पणजी : म्हादय संबंदिची गोंयची अवमान याचिका आनी हेर याचिकां सर्वोच्च न्यायालयांत बिरेस्तारा लेगीत सुनावणेक आयल्यो नात. 23 जानेवारीचे सुनावणे वळेरेचेर म्हादयचो आस्पाव आशिल्लो. बिरेस्तारा 30 वेर लेगीत ती सुनावणेक आयली ना. आतां येता त्या बिरेस्तारा 6 फेब्रुवारीक म्हादय याचिकांचेर सुनावणी जावपाची शक्यताय आसा. सुनावणेचे वळेरीचेर म्हादय याचिका 117 व्या नंबराचेर आसा. सरन्यायाधीश संजीव खन्ना, न्यायमुर्ती संजयकुमार आनी न्यायमुर्ती के. व्ही. विश्वनाथन हांच्या खंडपिठा मुखार याचिका सुनावणेक येतली, अशी म्हायती उदका पुरवण खात्याच्या अभियंत्यांनी दिली.

गोंया सयत कर्नाटक आनी महाराष्ट्रानूय लवादाच्या आदेशाक आव्हान दिलां. सगल्यो याचिका एकाच वेळार सुनावणेक येतल्यो.

म्हादयचें उदक घुंवडावपा खातीर कर्नाटका कडल्यान कळसा भांडुरा प्रकल्पाचें काम सुरू आसा. सगले परवाने घेवचे पयलीं कळसा भांडुरा प्रकल्पाचें काम सुरू करचें नात, अशी हमी कर्नाटकान सर्वोच्च न्यायालयांत दिल्या. कळसा – भांडुरा प्रकल्पाक सर्वोच्च न्यायालयान स्थगिती दिवंक ना. सुनावणे वेळार कळसा – भांडुरा प्रकल्पाक स्थगिती दिवपाची मागणी गोंयचे वतीन जावपाची आसा. सर्वोच्च न्यायालयांत काम करचे नात, अशी हमी दिवन लेगीत कर्नाटका कडल्यान कानालांचीं कामां सुरू आसात. गोंय सरकारान हे विशींचे पुरावे एकठांय केल्यात. ह्या पुराव्यां सयत अवमान याचिका दाखल केल्या.