भांगरभूंय | प्रतिनिधी
पणजी : म्हादयचे उदक घुंवडावपा सयत कामाच्यो निविदा कर्नाटक सरकार जारी करीत आसा. गोंय सरकार मात म्हादयचें उदक वाटावपा खातीर कसल्योच हालचाली करिना, अशी टिका विरोधी पक्षाच्या आमदारांनी सरकाराचेर केली.
विरोधी पक्ष फुडारी युरी आलेमांव, आरजीचे आमदार विरेश बोरकार, गोवा फॉरवर्डाचे आमदार विजय सरदेसाय हांणी सभाघरांत म्हादयचो मुद्दो मांडलो. विनियोग विधेयकाचेर उलयतना विजय सरदेसाय आनी युरी आलेमांव हांणी म्हादयचो विशय मांंडलो. विरेश बोरकार हांणी राज्यपालांच्या अभिभाशणाचेर उलयतना म्हादयचो उल्लेख केलो.
म्हादयचें उदक घुंवडावपा खातीर कर्नाटका कडल्यान नेटान यत्न सुरू आसात. कळसा – भांडुरा प्रकल्पा खातीर डीपीआराक मान्यताय मेळ्ळ्या. ते भायर तरेकवार कामां खातीरच्यो निविदा जारी केल्यात. हे फाटभुंयेर गोंय सरकारा कडल्यान कसल्योच हालचाली जायनात, असो आरोप युरी आलेमांव हांणी केलो.
राज्यपालांनी अभिभाशणांत लेगीत म्हादयचो उल्लेख करूंक ना. आवयसमान आशिल्ली म्हादय कर्नाटकाक विकली, असो आरोप विजय सरदेसाय हांणी केलो.
म्हादयचेर प्रकल्प उबारपा खातीर कर्नाटक सरकार अर्थसंकल्पांत निधीची तजवीज करता. कर्नाटक सरकार उदक घुंवडावपा विशीं गंभीर आसा. गोंय सरकार मात उदक वाटावपाचेर गंभीर ना अशें आमदार विरेश बोरकार हांणी म्हणलें. म्हादय खातीर सभाघर समिती स्थापन जाल्ली आसली तरी दोनूच बसका जाल्यात अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
