भांगरभूंय | प्रतिनिधी
उदकास्रोत खात्याची ‘प्रवाहा’ कडेन मागणी; फुडले बसकेंत निर्णय
भांगरभूंय । प्रतिनिधी
पणजीः म्हादय संबंदांत केंद्र सरकारान स्थापन केल्ले प्रवाह समिती वतीन गोंयच्या दोन मागण्यांचेर विचार जावंक ना. ते खातीर प्रवाह समितीन म्हादय पात्राची परतून पळोवणी करची, अशी मागणी करपी पत्र उदकास्रोत खात्यान प्रवाह समितीक दिलां. समितीचे फुडले बसकेंत हाचेर विचार जातलो, अशी म्हायती उदकास्रोत खात्याचे मुख्य अभियंते प्रमोद बदामी हांणी शुक्रारा ‘भांगरभूंय’ कडेन उलयतना दिली.
गोंय कर्नाटक आनी महाराष्ट्र ह्या तीन राज्यां मदीं फाटल्या कितल्याश्याच वर्सांच्यान म्हादयचो विशय गाजता. हे संबंदांत स्थापन केल्ल्या उदक तंटो लवादान अंतीम निवाडो दिले उपरांत लेगीत तिनूय राज्यांनी ह्या प्रस्नाचेर सर्वोच्च न्यायालयांत धांव घेतल्या. सर्वोच्च न्यायालयांत सुनावण्यो चालू आसतनाय कर्नाटकान बेकायदेशीर तरेन म्हादयचें उदक घुंवडावपाची प्रक्रिया चालूच दवरिल्ल्यान ताचेर नियंत्रण दवरचे खातीर स्वतंत्र समिती स्थापन करपीच आनी ताचें मुख्यालय गोंयांत स्तापन करपाची मागणी गोंय सरकारान केंद्रा कडेन केल्ली. ते प्रमाण केंद्र सरकारान म्हादय प्रस्नाचेर ‘प्रवाह’ समिती स्थापन करून ती 27 मे 2023 ह्या दिसा अधिसुचीत केली. हे समितीची पयली बसका गोंयांत जाले उपरांत समितीन गोंया सयत कर्नाटक आनी महाराष्ट्रांतले म्हादय पात्राची पळोवणी करपाचो निर्णय घेतलो. ते प्रमाण 4 ते 7 जुलय ह्या काळांत पळोवणी लेगीत केली. पळोवणे उपरांत 8 जुलयाक समितीची कर्नाटकांतल्या बंगळुरूंत बसका जाली. पूण हे बसकेंत प्रवाह समितीन सादर केल्ल्या अहवालांत कर्नाटकान म्हादय न्हंयेचें उदक घुंवडायल्ल्याचो उल्लेख करूंक ना. हाचे वयल्यान विरोधकांनी सरकाराचेर खर टिका करपाक सुरवात केले उपरांत आतां उदकास्रोत खात्यान समितीन पत्र धाडून म्हादय पात्राची परतून पळोवणी करपाची मागणी केल्या. समितीचे वांगडी फुडले बसकेंत हे संबंदांत योग्य तो निर्णय घेतले, अशेंय बदामी हांणी नमूद केलां.
पावसाच्या दिसांनी पळोवणी करप गरजेचें
कर्नाटकान म्हादयचो प्रवाह घुंवडायला, हे कळचे हे खातीर म्हादयची भर पावसाच्या दिसांनी पळोवणी करप खूब गरजेचें आशिल्लें. प्रवाह समितीन पावसाल्यांत म्हादय पात्राची पळोवणी केल्यार कर्नाटकाचें कारस्थान उजवाडाक येतलें, अशें गोंय सरकाराक दिसतालें. पूण समितीन पळोवणी केले उपरांत सादर केल्ल्या अहवालांत ते विशींचो कसलोच उल्लेख करूंक नाशिल्ल्यान गोंयची निरशेवणी जाल्या. कर्नाटकान कानाल खणून म्हादयचे उदक मलप्रभे मेरेन व्हेलां, हो आमचो दावो आसा. हाचे पुरावे लेगीत आमचे कडेन आसात. आमी ह्या प्रस्नाचेर सर्वोच्च न्यायालयांत लेगीत लडतात. प्रवाह समितीचे पळोवणेंत आमकां थंय लेगीत फायदो जावपाक शकता, असो विस्वास मुख्यमंत्री डॉ. प्रमोद सावंत हांणी कांय दिसां आदीं उक्तायल्लो. पूण प्रवाहाचे पळोवणेचो गोंयाक कसलोच फायदो जावंक नाशिल्ल्याचें लक्षांत आयिल्ल्यानूच उदकास्रोत खात्यान समितीन परतून पळोवणी करपाची मागणी केल्ल्याची म्हायती उदकास्रोत खात्याच्या वरिश्ठ अधिकाऱ्यान दिल्या.
विजय सरदेसाय आक्रमक जावपाचीं चिन्नां
गोवा फॉरवर्डाचे अध्यक्ष तशेंच आमदार विजय सरदेसाय हांणी प्रवाह समितीचे पळोवणे वयल्यान सरकाराचेर आरोप केल्ले. समितीच्या अहवालांत कर्नाटकान म्हादयचें उदक मलप्रभा न्हंयेंत घुंवडायल्ल्याचें नमूद करूंक ना. ते समितीचे भुमिकेचेर प्रस्नचिन्न उपस्थीत जाता, अशें तांणी म्हणिल्लें. ते उपरांत आतां स्वता उदकास्रोत खात्यान परतून पळोवणी करपाची मागणी केल्ल्यान आमदार सरदेसाय हाचे पयल्यान परतून आक्रमक जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
