भांगरभूंय | प्रतिनिधी
एनआयओच्या अहवालांत म्हायती
पणजी: म्हादय जल लवादान कर्नाटकाच्या म्हादय वळोवपाच्या मंजूर केल्ल्या दाव्या प्रमाण न्हंयेचें उदक वळयलें जाल्यार पुराय गोंयचेर व्हडलोसो परिणाम जावचो ना. मात कळसा प्रकल्पाक लागून म्हादय अभयारण्याच्या उत्तर भागांत व्हड परिणाम जावपाची शक्यताय उक्तायल्या.
राष्ट्रीय समुद्र विज्ञान संस्थेन (एनआयओ) जारी केल्ल्या अहवालांतल्यान ही म्हायती मेळ्ळ्या. हो अहवाल जर्नल ऑफ अर्थ सिस्टीम सायन्सांत प्रकाशीत जाला.
एनआयओ शास्त्रज्ञ के अनिल कुमार, डी शंकर आनी के सुप्रित हांणी तयार केल्ल्या अहवला प्रमाण लवादान परवानगी दिल्ले प्रमाण भांडुरा व्हाळांतल्यान २.१८ टीएमसी (६१.७३ दशलक्ष घनमीटर) उदक वळयिल्ल्यान गोंय- कर्नाटक शीमेवेल्या न्हंयेच्या प्रवाहाचेर थोडोच परिणाम जातलो. कळसा प्रकल्पांत म्हादय अभयारण्याच्या उत्तरेकडल्या भागांत जल लवादान परवानगी दिल्ल्या १.७२ टीएमसी (४८.७ दशलक्ष घनमीटर) उदक वळयल्यार हाचो व्हड परिणाम जातलो.
ऑगस्ट २०१८त निवाड्यात लवादान कर्नाटकाक वट्ट १३.४२ टीएमसी (३८० एमसीएम) उदक मंजूर केल्लें. तांतलें ८.०२ टीएमसी (२२७ एमसीएम) प्रस्तावीत म्हादय जलविद्युत प्रकल्पा खातीर, १.५ टीएमसी (४२ एमसीएम) खोर्यांतलो वापर आनी शिंपणावळी खातीर जातालो.
तशेंच कळसा प्रवाहांतल्यान १.७२ टीएमसी (४८ एमसीएम) आनी प्रस्तावीत भांडुरा धरणाचेर २.१८ टीएमसी (६१ एमसीएम) उदक वळोवपाक परवानगी दिल्ली. लवादान वट्ट कर्नाटकाक म्हादय खोर्यांतलें ११० एमसीएम उदक मलप्रभांत वळोवपाची परवानगी दिली. संशोधकांच्या मतान, गोंयान उदक वळोवपाच्या परिणामांचो दावो केल्लो. हो दावो न्यायाधिकरणान मान्य केल्लो. मात तो योग्य न्हय. कारण हाचो परिणाम मर्यादीत आसा.
ह्या प्रकल्पाक लागून मांडवी न्हंयेच्या मुखार वा कुंभारजुआ कानालांतले उदकाचे येरादारीचेर कसलोच परिणाम जावचो ना. मांडवींतली उदकाची येरादारी ही भरती-सुकतेचेर शक्य जाता. जेन्ना म्हादयचो सैमीक प्रवाह उणो आसता तेन्नाय येरादारी शक्य आशिल्ल्याचें अहवालांत म्हणलां.
आरजी कडल्यान निशेध
एनआयओ अहवालांत म्हादयचें उदक वळयल्यारूय गोंयांक फरक पडचो ना, अशें म्हणलां. हे गद्दारीचो आमी निशेध करतात. येवपी विधानसभा अधिवेशनांत हो प्रस्न हजर करतले. तशेंच म्हादय सभाघर समितीक पत्र बरोवन विचारतले, अशें आरजीपीचे अध्यक्ष मनोज परब हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
