भांगरभूंय | प्रतिनिधी
म्हादय बचाव अभियानाची मुख्यमंत्र्या वांगडा बसका
भांगरभूंय । प्रतिनिधी
पणजी : म्हादयची सुनावणी सर्वोच्च न्यायालयांत येवपा खातीर खासा यत्न करचे. म्हादयचें उदक घुंवडावपाच्या प्रकल्पाचो एरियल सर्व्हे करचो. तशेंच केंद्रीय पर्यावरण मंत्र्या वांगडा भेट घडोवन हाडपाची मागणी म्हादय बचाव अभियानाच्या शिश्टमंडळान मुख्यमंत्र्या कडेन मागलां. जाल्यार शिश्टमंडळान केल्ल्यो सगळ्यो मागण्यो विचारांत घेतले, अशें आस्वासन मुख्यमंत्री डॉ. प्रमोद सावंत हांणी दिलें.
म्हादयच्या विशया वयल्यान म्हादय बचाव अभियानाच्या शिश्टमंडळाची मुख्यमंत्री डॉ. प्रमोद सावंत आनी उदकास्त्रोत मंत्री सुभाष शिरोडकार हांचे वांगडा मंत्रालयांत बसका जाली. ह्या वेळार म्हादय बचाव अभियानाची निमंत्रक निर्मला सावंत, पर्यावरण मोगी प्रा. राजेंद्र केरकार आनी प्रजल साखरदांडे हजर आसले.
ह्या वेळार उलयतना केरकार हांणी सांगलें, कितलेशेच खेपे म्हादयचें प्रकरण सर्वोच्च न्यायालयांत येता, पूण तांची सुनावणी जायना. न्यायालयांत म्हादयची सुनावणी येवपा खातीर विशेश यत्न करचे आनी दिल्लीच्या आदवोगांदाचो सल्लो घेवचो.
कळसा भंडुरा उदक घुंवडावपाच्या प्रकल्पाचो एरियल सर्व्हे करचो. तशेंच शिश्टमंडळाक घेवन ह्या प्रकल्पाची पळोवणी घडोवन हाडची. जर सरकाराक ही पळोवणी घडोवपाक जमना जाल्यार आमी शिश्टमंडळ स्वता प्रकल्प सुवातेर वचून भेट दितले आनी ते खातीर सरकारान आमकां पुलिसांची राखण दिवची, अशी मागणी केरकार हांणी केली.
ते भायर म्हादय बचाव अभियान हांच्या शिश्टमंडळाची केंद्रीय पर्यावरण मंत्री भुपेंद्र यादव हांचे कडेन भेट घडोवन हाडपाची मागणी आमी मुख्यमंत्री डॉ. प्रमोद सावंत हांचे कडेन केल्या. हे भेटींत म्हादय संदर्भांतले कांय महत्वाचे मुद्दे आमकां तांचे मुखार स्पश्टपणान मांडपाक जाय. ह्या तीन मागण्यांचेर मुख्यमंत्र्यान आमकां सकारात्मक प्रतिसाद दिला, अशें राजेंद्र केरकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
