भांगरभूंय | प्रतिनिधी
म्हादय बचाव अभियान सरकाराक बरयतलें पत्र
भांगरभूंय । प्रतिनिधी
पणजी : म्हादयचें उदक घुंवडायल्यार गोंयचो सैम आनी उदकाचेर कितल्या प्रमाणांत परिणाम जातलो, हाचो विज्ञानीक रितीन अभ्यास जावपाची गरज आसा. सरकारान मान्यताय प्राप्त विज्ञानीक वा संस्थे वरवीं अभ्यास करचो, अशी मागणी म्हादय बचाव अभियानान केल्या. मुख्यमंत्री डॉ. प्रमोद सावंत हांकां पत्र बरोवन ही मागणी करतले, अशें अभियानाची निमंत्रक निर्मला सावंत हांणी सांगलें.
एनआयओचे विज्ञानीक के. अनील कुमार, डी. शंकर आनी के. सुप्रीत हांणी म्हादयच्या उदकाचेर अभ्यास केला. तांचो अहवाल जर्नल ऑफ अर्थ सिस्टीम सायन्स हातूंत प्रकाशीत जाला. कर्नाटकान म्हादयचें उदक घुंवडायलें जाल्यार गोंयाचेर चड परिणाम जावचो ना, असो निश्कर्श अहवालांत आसा. ह्या निश्कर्शाक लागून गोंयचें पर्यावरण कार्यकर्ते आनी राजकी पक्षां मदीं खवदळ निर्माण जाला. हो अहवाल पक्षपाती आशिल्याचो आरोप जाला. अहवालाच्या वैध्यते विशीं लेगीत दुबाव उक्तायला.
ज्या विज्ञानिकांनी हो अहवाल केला, तो खंयच्या निकशाचेर केला? तांणी म्हादयची भोंवडी करून म्हायती मेळयल्या काय? हें स्पश्ट जावपाक जाय. खंयच्याय विज्ञानिकान अभ्यास करून निश्कर्श जारी केलो म्हूण ताका सरकार वा न्यायालय मान्यताय दिवपाक शकना. म्हादयचें उदक आनी उदक घुंवडायल्यार गोंयचो सैम आनी उदका पुरवणेचेर जावपी परिणामांचो विज्ञानीक रितीन अभ्यास जावपाक जाय. सरकारान तो करपाक जाय. ना जाल्यार कोणूय विज्ञानिक प्रबंध वा हेर माध्यमांतल्यान आपणाक फावो तसो निश्कर्श काडीत रावतलो, अशें निमंत्रक निर्मला सावंत हांणी म्हणलां. अभियानाचे वांगडी प्रा. राजेंद्र केरकार हांणी लेगीत निश्कर्शाचेर दुबाव उक्तायला. हो अहवाल करपी विज्ञानिकांनी म्हादयची केन्ना भोंवडी करूंक ना. उदक वा हेर गरजेचे तपशील एकठांय करूंक नात. पावस आनी उदका विशीं उपलब्ध आशिल्ले म्हायतीचेर तांचें संशोधन आसा. हो निश्कर्श पक्षपाती आसा, अशें राजेंद्र केरकार हांणी म्हणलां. म्हादयच्या पात्रांत गिमान कितलें उदक आसता? पावसांत कितलें आसता? उदक खंय मेरेन पावता, ताची म्हायती घेवन संशोधन जावपाक जाय, अशें तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
