भांगरभूंय | प्रतिनिधी
कर्नाटकांतल्या पर्यावरणवाद्यांनी उक्तायलो हुस्को
भांगरभूंय | प्रतिनिधी
पणजी : म्हादय उदक वाद लवादान (एमडब्ल्यूडीटी) दिल्ले प्रमाण म्हादय न्हंयेच्या उदकाचो आपलो वांटो घुंवडावन म्हादय प्रकल्प चालीक लावपा खातीर केंद्रा कडल्यान निमाणी मान्यताय मेळोवपाक कर्नाटक खर यत्न करता. म्हादय घुंवडायल्यार अस्तंत घाटांतल्या व्हड रानाचेर वायट परिणाम जातलो म्हूण पर्यावरणवाद्यांनी हुस्को उक्तायला.
म्हादय घुंवडायल्यार उत्तर कर्नाटकाचें रेंवाटांत रुपांतर जातलें अशें सांगून परिसारक्कगी नावूचे (वी फॉर एन्व्हायर्नमेंट) कॅप्टन नितीन धोंड हांणी हे विशीं हुस्को उक्तायलो. पर्वतांच्या सह्याद्री पर्वत रांके वयल्या जिवावळींचेर चर्चा करपा खातीर हालींच धारवाडांत जाल्ले दोन दिसांचे बसकेंत तांणी मलप्रभा न्हंये वयलो अभ्यास – अहवाल सादर केलो.
खानापूर म्हालांतलो पावस, मलप्रभेचें उदक, उत्तर कर्नाटकांतल्या लोकांचें जिवीत आनी उदरनिर्वाह तिगोवन दवरप आनी उत्तर कर्नाटकाचें पुरोगामी रेंवाट जावपा पसून आडावपाक खानापूर म्हाला लागसारच्या रानांनी केल्ल्या म्हत्वाच्या वावरा फाटलें हवामान शास्त्र तांणी स्पश्ट केलें.
थंयचे सैमीक गजालींत हस्तक्षेप केल्यार तांचें विभाजन आनी लुकसाण जावन थंयच्या वाठारांतल्या उदकाचे सुरक्षेचेर परिणाम जातलो, पुराय उत्तर कर्नाटक वाठारांतल्या हवामान आनी पावसाच्या चक्रांत बदल जातलो, अशें कॅप्टन धोंड हांणी सांगलें.
2003 सावन न्हंयेचे देगेर जावपी अतिक्रमणां काडून उडोवपाक, न्हंयेची राखण आनी पुनरुज्जीवन करपाची वकिली करपा खातीर आनी मलप्रभा न्हंयेक अप्रदुशीत, अतिक्रमण नाशिल्ली, निरोगी न्हंय म्हूण व्हांवपाच्या हक्का खातीर कायदेशीर झुजांत वांटेकार जाल्ल्या रामदुर्गच्या डॉ. पूर्णिमा गौरोजी हांणी केल्ल्या यत्नांचेर अॅड. गौरोजी हांणी उजवाड घालो. उच्च न्यायालयाचे आदेश आनी लोकायुक्ताचे निर्देश आसून लेगीत न्हंयेंत उडयल्ल्या घन कोयराक लागून चड प्रमाणांत प्रदुशण, शेतांत रसायनांचें लीचिंग, अनियंत्रीत उदक काडप, उपचार करूंक नाशिल्ल्या द्रव घाणयाऱ्या उदकाचो विसर्ग आदी कारणांक लागून न्हंयेक त्रास जायत आसात, अशें अॅड. गौरोजी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
