भांगरभूंय | प्रतिनिधी
पणजी : कर्नाटका आड गोंय सरकारान दाखल केल्ल्या म्हादय वेल्या अवमान याचिकेचेर सर्वोच्च न्यायालयांत 23 जानेवारीक सुनावणी जातली. सरन्यायाधीश संजीव खन्ना, न्यायमुर्ती संजयकुमार आनी न्यायमुर्ती के. व्ही. विश्वनाथन हांच्या पिठा मुखार म्हादयच्या याचिकांचेर सुनावणी जातली.
सुनावणी खातीर उदका पुरवण खात्याचे मुखेल अभियंते प्रमोद बदामी, अधिक्षक अभियंते दिलीप नायक तशेंच आदवोगादांचो पंगड दिल्ली वतलो.
गोंयच्या अवमान याचिके सयत लवादाच्या आदेशाक आव्हान दिवपी याचिका एकाच वेळार सुनावणेक येतल्यो. गोंया सयत कर्नाटक आनी महाराष्ट्रानूय लवादाच्या आदेशाक आव्हान दिलां. सगल्यो याचिका एकाच वेळार सुनावणेक येतल्यो.
सर्वोच्च न्यायालयांत 23 जानेवारीक जावपी सुनावणेच्या वळेरीचेर गोंयची याचिका 117व्या नंबराचेर आसा. हाका लागून ती बिरेस्तारा उपरांत लेगीत सुनावणेक येवपाची शक्यताय आसा, अशें अॅडव्होकेट जनरल देविदास पांगम हांणी सांगलें.
म्हादयचें उदक घुंवडावपा खातीर कर्नाटका कडल्यान कळसा भांडुरा प्रकल्पाचें काम सुरू आसा. सगले परवाने घेवचे पयलीं कळसा भांडुरा प्रकल्पाचें काम सुरू करचें ना, अशी हमी कर्नाटकान सर्वोच्च न्यायालयांत दिल्या. कळसा – भांडुरा प्रकल्पाक सर्वोच्च न्यायालयान स्थगिती दिवंक ना. सुनावणी वेळार कळसा – भांडुरा प्रकल्पाक स्थगिती दिवपाची मागणी गोंयचे वतीन जातली. सर्वोच्च न्यायालयांत काम करचे ना, अशी हमी दिवन लेगीत कर्नाटका कडल्यान कालव्यांची कामां सुरू आसा. गोंय सरकारान हे विशीचे पुरावे एकठांय केल्यात. ह्या पुराव्यां सयत अवमान याचिका दाखल केल्या. सर्वोच्च न्यायालयाच्या अवमानाचेर कारवाय करपाची मागणी गोंय सरकार करतलें.
2 म्हयन्यांत रानां जीव परवानो दिवपाची कर्नाटकाची मागणी
कळसा – भांडुरा प्रकल्पाक केंद्रान दोन म्हयन्यां भितर रानां जीव मंडळाचो परवानो दिवचो अशी मागणी कर्नाटकान केल्या. कर्नाटकाचे कायदो मंत्री एच. के. पाटील हांणी ही मागणी केल्या. दोन म्हयन्यांत केंद्रान रानां जीव मंडळाचो परवानो दिलो ना जाल्यार कर्नाटक फुडली कारवाय करतलें, अशी शिटकावणी कर्नाटकाचे कायदो मंत्री एच. के. पाटील हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
