भांगरभूंय | प्रतिनिधी
उदका स्रोत खात्याची फुडली प्रक्रिया बेगिनूच
भांगरभूंय : प्रतिनिधी
पणजी : म्हादय न्हंयेचेर बांदपा आशिल्ल्या 6 धरणांक मुख्य सचिवाचे अध्यक्षते खाला कामकाज सल्लागार मंडळा कडल्यान मंजुरी मेळ्ळ्या. ताका लागून ह्या धरणांची फुडली प्रक्रिया बेगिनूच सुरू जातली, अशी म्हायती उदकास्रोत खात्याच्या वरिश्ठ अधिकाऱ्यान सोमारा ‘भांगरभूंय’ कडेन उलयतना दिली.
कर्नाटका कडल्यान म्हादय न्हंयेचें उदक धुंवडावपाचे यत्न फाटल्या साबार वर्सां सावन चालूच आसात. ताका लागून गोंय सरकारान म्हादयचेर 8 लघू धरणां बांदून तातूंतल्या उदकाचो गोंयच्या लोकांक फायदो करून दिवपाचो विचार केला. ह्या आठांतल्या काजूमळ आनी तातोडीच्या धरणां खातीर गरजेचे सगळे परवाने पर्यवरण खात्या कडल्यान मेळ्ळे. पूण हेर स धरणांचो विशय कामकाज सल्लागार मंडळान प्रलंबीत दवरिल्लो. मंडळाच्या हालींच जाल्ले बसकेंत ह्या स धरणांक मंजुरी दिल्या. ते संबंदांतली वर्क ऑर्डर बेगिनूच जारी करतले. ह्या धरणां खातीर सुमार 33 कोटींचो खर्च येतलो, अशेंय ह्या अधिकार्यान स्पश्ट केलें. मजगतीं, मुख्यमंत्री प्रमोद सावंत हांणी पोरूंच्या अर्थसंकल्पांत लघू धरणां खातीर कोटींनी रुपयांची तजवीज केल्ली. तशेंच बेगिनात बेगीन हीं सगळीं धरणां बांदपाची हमी विधानसभा सभाघराक दिल्ली.
‘प्रवाहा’चे बसकेची तयारी सुरू
म्हादय संबंदांत केंद्र सरकारान स्थापन केल्ले प्रवाह समितीची बसका 22 जुलयाक बंगळुरूंत जातली. उदकास्रोत खात्याच्या अधिकाऱ्यांनी हे बसकेची तयारी सुरू केल्या. म्हादय देगणाची पावसाळ्यांत परतून पळोवणी आनी कर्नाटका कडल्यान कळसा-भांडुराचे सुवातेर सुरू जाल्लें जमीन संपादनाचें काम ह्या दोन विशयांचेर गोंयचे अधिकारी बसकेंत उजवाड घालतले, अशेंय ह्या अधिकाऱ्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
