भांगरभूंय | प्रतिनिधी
पणजीः म्हादय विशीं स्पान केल्ल्या सभाघर समितीची बसका 10 जानेवारीक जातली. पयलीं ही बसका 27 डिसेंबराक घेवपाचें थारायिल्लें. पूण, कांय कारणांक लागून ही बसका 10 जानेवारीक जावपाचें थारायलां.
गोंयची जीवनदायिनी आशिल्ल्या म्हादय न्हंयचें उदक बेकायदेशीर रितीन घुंवडावपाचें यत्न कर्नाटकांतल्यान फाटलीं कितलींशींच वर्सां चालू आसात. ह्या संदर्भांत उदका वाद लवादान निमाणो निवाडो दिले उपरांत लेगीत कर्नाटकान गुपीतपणान हें काम चालू दवरला. हाका लागून सत्ताधारी पक्ष आनी विरोधी पक्ष दरेक विधानसभा वेंचणुकेंत आनी अधिवेशनांत एकामेका मुखार येतात. उदका वाद लवादाच्या निमाण्या निकाला उपरांत गोंय सयत कर्नाटक आनी महाराष्ट्र सर्वोच्च न्यायालयांत पावल्यात. पूण कांय म्हयन्यां आदीं केंद्रीय उदका आयोगान कर्नाटकांतल्या कळसा-भांडुरा प्रकल्पा खातीर सुदारीत प्रकल्प अहवालाक मान्यताय दिल्ल्यान राज्य विधानसभा अधिवेशनांत वाद सुरू जालो. त्या वेळार सरकारान म्हादय विशीं दरेक निर्णय घेवपा खातीर उदका संसाधन मंत्री सुभाष शिरोडकार हांच्या अध्यक्षते खाला सभाघर समिती स्थापन केल्या. तातूंत सगळ्या पक्षांतल्या आमदारांचो आस्पाव आसा. फाटले कितलेशेच म्हयने हे समितीची बसका जावंक ना. निमाणें सभाघर समितीची बसका 10 जानेवारीक घेवपाचे थारायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
