भांगरभूंय | प्रतिनिधी
-डॉ. निंबाळकरः विशय सुटावो करपाक तयार आशिल्ल्याचे केले स्पश्टपणजीः गोंयचे मुख्यमंत्री डॉ. प्रमोद सावंत तयार जाल्यार ह्या विशयाचेर कर्नाटकाच्या मुख्यमंत्र्या कडेन बसकेची वेवस्था करपाची जापसालदारकी आमी घेतले अशें गोंय काँग्रेसीची प्रभारी सचीव डॉ. अंजली निंबळकर हांणी शुक्रारा पत्रकारां कडेन उलयतना ही गजाल स्पश्ट केली.
गोंयचो जीव आशिल्ल्या म्हादय न्हंयचें उदक कर्नाटकांतल्यान बेकायदो रितीन घुंवडापाचें काम सुरू आसा. हे विशीं राज्य काँग्रेस परत परत राज्य सरकाराचेर आरोप करता. अशें परिस्थितींत म्हादय प्रस्नांत तुमची भुमिका कितें अशें पत्रकारांनी विचारलें, तेन्ना गोंय कर्नाटकांतलो म्हादय प्रस्न सोडोवपाची जापसालदारकी प्रधानमंत्री नरेंद्र मोदी हांचेर आसा. गोंयचे मुख्यमंत्री कर्नाटकाच्या मुख्यमंत्र्या कडेन बसका घेवपाक तयार आसत जाल्यार तांचे मदीं बसका घडोवन हाडून ही गजाल सुटावी करपाची जापसालदारकी घेवपाक आमी तयार आसात, अशें डॉ. निंबाळकर हांणी सांगलें. हो प्रस्न प्रधानमंत्री नरेंद्र मोदी हांच्या अधिकार क्षेत्रांत येता म्हणून प्रधानमंत्री नरेंद्र मोदी हांचे खातीर ह्या प्रकरणांत मध्यस्थी करप आनी दोनूय मुख्यमंत्र्यां कडेन बसका घेवप म्हत्वाचें असोय उल्लेख तांणी केलाे.
विजय सरदेसाय परतून आक्रमक
म्हादय वयल्यान गोवा फॉरवर्डाचे अध्यक्ष तशेंच आमदार विजय सरदेसाय परतून एकदां आक्रमक जाल्यांत. गोंय सरकारान म्हादय न्हंय कर्नाटक सरकाराक विकल्या. हातूंत मुख्यमंत्री डॉ. प्रमोद सावंत हांकां वाचाेवपा खातीरूच केंद्र सरकारान ‘प्रवाह’ समिती स्थापन केल्या. ताका लागुनूच प्रवाह समितीच्या अहवालांत कर्नाटकान म्हादय न्हंय घुंवडावपाचो उल्लेख ना, असो दावो तांणी सोशल मिडिया वरवीं केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
