भांगरभूंय | प्रतिनिधी
पणजीः मंगळारा बंगळुरूंत जाल्ले बसकेंत पावसाच्या दिसांनी म्हादय देगणाची, तशेंच म्हादयचेर नियोजीत आशिल्ल्या ल्हान धरणाची परतून तपासणी करपाची गोंय सरकारान केल्ल्या मागणीक कर्नाटकान खर विरोध केला, अशें बसकेक हाजीर आशिल्ल्या अधिकाऱ्यांनी आमच्या प्रतिनिधी कडेन उलयतना सांगलें.
फाटल्या कांय वर्सां सावन गोंय, कर्नाटक आनी महाराष्ट्र ह्या तिनूय राज्यांनी म्हादय प्रस्ना विशीं केंद्र सरकारान तयार केल्ले ‘प्रवाह’ समितीची मंगळारा कर्नाटकांतल्या बंगळुरू शारांत बसका जाली. हे बसकेक कर्नाटकांतले सुमार 30 अधिकारी हाजीर आशिल्ले. पूण गोंयांतल्यान मात कांय निवडक अधिकारी धाडिल्ले.
गोंय सरकाराचे विनवणे प्रमाण प्रवाह समितीन कांय म्हयन्यां आदीं म्हादय देगणाची पळोवणी केली. पूण ही पळोवणी चुकीची जाली. समितीन कळसा-भांडुरा सुवातेची पळोवणी करूंक ना असो दावो गोंयांतल्या विरोधी पक्षांनी केल्या उपरांत राज्य सरकारान पावसाच्या दिसांनी म्हादय देगणाची परतून तपासणी करपाचो प्रस्न मांडलो. कांय दिसां आदीं पत्रकारां कडेन उलयतना मुख्यमंत्री डॉ. प्रमोद सावंत हांणीय बंगळुरूंत जावपी प्रवाह बसकेंत गोंयचे अधिकारी ह्या विशयाचेर भर दितले अशें स्पश्ट केलें. पूण हो विशय प्रवाह बसकेच्या अजेंड्यांत नाशिल्लो.
गोंयच्या अधिकाऱ्यांनी पुनर्विलोकनाचो प्रस्न मांडटकूच कर्नाटकान खर हरकत घेतली. हाचे भायर गोंयांतल्या म्हादयचेर नियोजीत आशिल्ल्या ल्हान धरणांकूय विरोध केला अशें अधिकाऱ्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
