भांगरभूंय | प्रतिनिधी
थळाव्या स्पोर्टस क्लबाचो खर विरोध
फोंडें : म्हाड्डोळ- कुंकळ्ळेंच्या खेळां मैदानाचेर म्हायती तंत्रज्ञान खात्यान मोबायल टॉवर उबारपाक एके खाजगी कंपनीक परवानगी दिल्या. हाका ग्रामस्थ आनी थळाव्या स्पोर्टस क्लबान खर विरोध केला.
खेळां आनी युवा संचालनालयान ताब्यांत घेतिल्ल्या ह्या मैदानाचेर खासदार निधींतल्यान बांदकाम केल्लें. थळावी पंचायत आनी स्पोर्ट्स क्लबा कडेन तें मैदान सांबाळपा खातीर दिल्लें. हे सुवातेर मोबायल टॉवर उबारपाक मंजुरी मेळिल्ल्यान कुंकळ्ळें स्पोर्ट्स क्लबान खेळां संचालक डॉ. अजय गावडे हांचे कडेन लेखी आक्षेप नोंद केला. डॉ. गावडे हांणी ह्या आक्षेपाची गंभीर दखल घेवन, टॉवर उबारपी कंपनीच्या प्रतिनिधीक आपोवन घेवन काम बंद करपाचे तोंडी आदेश दिल्यात.
कंपनीच्या प्रतिनिधी प्रमाण, पर्यायी सुवात दाखोवची, ना जाल्यार पुलीस संरक्षणांत मंजूर केल्ले सुवातेरूच टॉवर उबारतले.
हे विशीं थळावे आमदार गोविंद गावडे हांचे कडेन हस्तक्षेप करपाची मागणी केली तेन्ना तांणी, हांव हे विशीं कांयच करपाक शकना. दुसरी सुवात दाखयात अशें सांगीत हात वयर केले, अशी म्हायती क्लबच्या पदाधिकार्यांनी ह्या प्रतिनिधीक दिली.
हे सरकारी मंजुरींत व्हडा प्रमाणांत लिपोवन दवरपाचे प्रकार घडिल्ल्याचो दुबाव ग्रामस्थां कडल्यान उक्तायतात. म्हायती तंत्रज्ञान खात्यान ऑक्टोबर २०२४ सावन पत्रवेव्हार सुरू केल्लो. सुवात निश्चीत करपा खातीर जोड पळोवणी करपाची जापसालदारकी फोंडें म्हाल सहाय्यक शारिरीक शिक्षण अधिकार्यां कडेन दिल्ली. मात तांणी हे विशीं कसलेच तरेचो अहवाल मुख्यालयाक दिवंक नाशिल्ल्याचो आरोप आसा. मजगतीं, मोबायल टॉवरच्या मंजूर सुवातेची गुगल इमेज सोशल मिडियाचेर व्हायरल जाल्ल्यान खेळां मोगीनी हाचेर खर प्रतिक्रिया उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
